म्याग्दी । जिल्लामा अघिल्लो वर्षको तुलनामा यस वर्ष आलु उत्पादन ३३ प्रतिशतले घटेको कृषि ज्ञान केन्द्र मुस्ताङले जनाएको छ ।
केन्द्रका प्रमुख प्रकाश बस्ताकोटीले डढुवारोग र अधिक वर्षाका कारण आलु उत्पादन घटेको बताए ।
केन्द्रका अनुसार गत वर्ष ९ हजार ६०३ मेट्रिक टन आलु उत्पादन भएकोमा यस वर्ष ६ हजार ३६३ मेट्रिक टन आलु उत्पादन भएको छ ।
‘यसपालि आलुको बोट हुर्कने समयमा लगातार वर्षा हुँदा वृद्धि विकास राम्रो हुन सकेन,’ प्रमुख बस्ताकोटीले भने, ‘डढुवा रोगका प्रकोप पनि आलु उत्पादन घट्नुको कारण हो ।’
स्थानीय तहका कृषि शाखासँग समन्वय गरी आलुको क्रप कटिङ गरिएको थियो । चैत–वैशाख महिनामा लगाइने आलु असोज–कात्तिक महिनामा भित्र्याउने गरिन्छ । गत वर्ष प्रतिहेक्टर ३० दशमलव ७८ मेट्रिक टन आलु उत्पादन भएकोमा यस वर्ष २० दशमलव २ मेट्रिक टन फल लागेको छ । मुस्ताङको ३१५ हेक्टर क्षेत्रफलमा आलु खेती हुने गरेको छ ।
अघिल्लो वर्षको तुलनामा यसपालि आलु खेती हुने क्षेत्रफल ३ हेक्टरले भएको थियो ।
मुस्ताङमा उत्पादन हुने आलु पोखरा, काठमाडौं, चितवन लगायतका बजारमा खपत हुने गरेको छ । केन्द्रका अनुसार यहाँ उत्पादन हुने आलु २० प्रतिशत बीउ र १० प्रतिशत उपभोगका लागि खपत भई बाँकी ७० प्रतिशत निकासा हुन्छ । आलु प्रतिकिलो सरदर ५० रुपैयाँका दरले बिक्री हुन्छ ।
यहाँ गत वर्ष ४८ करोड ९ लाख रुपैयाँ मूल्य बराबरको आलु उत्पादन भएकामा यसपालि ३१ करोड ८१ लाख बराबरको मात्रै भएको छ । हिमाली चिसो हावापानीमा प्रांगारिक विधिबाट विषादिको प्रयोग विना उत्पादन भएको आलुको बजारमा उच्च माग रहेको किसान रोशन थकालीको भनाइ छ ।
‘प्रतिपाथी १५० रुपैयाँका दरले आलु बिक्री हुने गरेको छ,’ किसान थकालीले भने, ‘एक पाथीमा करीब ३ केजी आलु हुन्छ ।’ बारीमा नखन्दै व्यापारीले अग्रिम पैसा दिएर आलु खरिद गर्छन् । मुस्ताङ घुम्न जानेहरूले पनि कोसेलीका रूपमा आलु किनेर लैजाने गर्छन् । यहाँको आलु अन्यत्रको तुलनामा स्वादिलो हुने भएकाले मुस्ताङको आलुको माग शहरमा बढी हुने गरेको छ ।
आलु खेतीमा भेडा–च्याङग्रा, गाई, गोरु र चौंरीको मल प्रयोग हुन्छ । आलु खेतीका लागि गण्डकी प्रदेश सरकारमार्फत चालू आर्थिक वर्षमा प्रतिरोपनी ७ हजार ५०० अनुदान छुट्याइएको छ ।