काठमाडौं । स्वास्थ्य तथा जनसंख्यामन्त्री मोहनबहादुर बस्नेतले आगामी शैक्षिक सत्रदेखि १०० देखि ३०० शय्याका अस्पतालमा नर्सिङ र ‘प्यारामेडिक्स’को पढाइ सुरु हुने बताएका छन् ।
आज बुधबार शुक्रराज ट्रपिकल तथा सरुवा रोग अस्पताल टेकुको ९०औं वार्षिकोत्सव समारोहमा मन्त्री बस्नेतले आगामी शैक्षिक सत्रमा सातै प्रदेशका साविकका अञ्चल अस्पतालमा चिकित्सा शिक्षाको अध्यापन सुरु गर्न मन्त्रालयले तीव्र तयारी गरिरहेको जानकारी दिए ।
उनले टेकु अस्पताललाई मन्त्रालयको नीतिअनुसार नर्सिङ तथा पारामेडिकको शैक्षिक कार्यक्रम सञ्चालनका लागि तयार रहन निर्देशन दिए । ‘आउँदो शैक्षिक सत्रदेखि देशका सबै ठूला अस्पतालमा नर्सिङ र प्यारामेडिक्सको पढाइ सुरु हुन्छ । सरकारको निर्णय छिटो कार्यान्वयनमा ल्याउन मन्त्रालयले तयारी गरिरहेको छ,’ उनले भने, ‘अस्पतालले पनि आवश्यक जनशक्ति उत्पादनको तयारी गर्नुपर्छ ।’
मन्त्रालयले १०० देखि ३०० शय्यासम्मका अस्पतालमा नर्सिङ र प्यारामेडिक्सको पढाइ गर्ने र ३०० शय्याभन्दा माथिका अस्पतालमा ‘एमबीबीएस’को पढाइ गर्ने निर्णय गरेर मन्त्रिपरिषद्मा पठाइसकेको मन्त्री बस्नेतले जानकारी दिए ।
सरकार चिकित्सा शिक्षा ऐन परिमार्जनको तयारीमा लागको कार्यक्रममा जानकारी गराइएको थियो । वार्षिकोत्सव समारोहमा अस्पतालमा निर्देशक डा. युवानिधि बसौलाले ३०० शय्याको विशिष्टकृत सरुवा रोगको नयाँ भवन निर्माण प्रक्रियामा रहेको जानकारी दिए । उनले विशिष्टकृत अस्पतालको न्यूनतम् सेवा मापदण्ड सुरु भइसकेको बताए ।
नर्सिङ प्रशासक रोशनीलक्ष्मी तुईतुईले अस्पतालले आउँदो शैक्षिक सत्रदेखि नर्सिङको पढाइ गर्ने गरी तयारीबारे जानकारी दिँदै सरकारबाट अनुमति प्राप्त भएमा अध्यापन सुरु गरिने प्रतिबद्धता जनाए ।
वार्षिकोत्सवका अवसरमा कोभिड–१९ को महामारीमा अग्रणी भूमिका निर्वाह गरेको भन्दै अस्पतालले प्रमुख कन्सल्टेन्ट फिजिसियन डा. विमल शर्मा चालिसेलाई सम्मान गरेको थियो । अस्पतालमा अहिले १०० शय्या सञ्चालनमा रहेको छ । त्यसमा २० वटा आकस्मिक शय्या रहेका छन् । अस्पतालबाट दैनिक २ हजार जना बिरामीले बहिरङ्ग सेवा लिने गरेको निर्देशक डा. बसौलाले जानकारी दिए ।
गत आर्थिक वर्ष २०७९/८० मा यस अस्पतालबाट १ लाख ६१९ जनाले बहिरङ्ग उपचार सेवा लिएका छन् । सोही आवमा ११ हजार ४४६ जना बिरामीले आकस्मिक उपचार सेवा लिएका छन् भने १ हजार ९८७ जना अस्पतालमा भर्ना भएका थिए ।
