मकवानपुर । बागमती प्रदेशमा राष्ट्रियसभा सदस्य निर्वाचनको तयारी पूरा भएको छ ।
बागमती प्रदेशमा ४ राष्ट्रियसभा सदस्यका लागि बिहीबार मतदान हुनेछ ।
निर्वाचन आयोग प्रदेश निर्वाचन कार्यालय बागमती प्रदेश हेटौंडाका निमित्त प्रमुख ताराप्रसाद आचार्यका अनुसार हेटौंडा–४ स्थित भुटनदेवी माविको प्राविधिक भवनमा मतदानको व्यवस्था गरिएको छ ।
प्रदेशसभा सदस्य, प्रदेशका स्थानीय तहका प्रमुख/उपप्रमुख तथा अध्यक्ष/उपाध्यक्षले मतदान गर्नेछन् । मतदानका लागि छुट्टाछुट्टै मतदान केन्द्रको व्यवस्था गरिएको उनले बताए ।
प्रत्येक मतदान केन्द्रमा १० कर्मचारी खटाइने छन् । मतदान सकिएलगत्तै मतगणना सुरु गरिने र नतिजा साँझसम्म सार्वजनिक गरिने मुख्य निर्वाचन अधिकृत श्रीप्रसाद सञ्जेलले बताए । निर्वाचनमा १५ जनाको उम्मेदवारी परेको छ ।
नेपाली कांग्रेसबाट महिलातर्फ विष्णुकुमारी पुडासैनी र अन्यतर्फ जितजंग बस्नेत, माओवादी केन्द्रबाट अपाङ्गतर्फ श्रीकृष्ण अधिकारी तथा नेकपा एकीकृत समाजवादीबाट दलिततर्फ घनश्याम रिजाल विश्वकर्मा उम्मेदवार छन् ।
नेकपा एमालेबाट महिलातर्फ रोजकुमारी चौलागाई, अन्यतर्फ त्रिलोचन निर्मल पौडेल, अपाङ्गता/अल्पसंख्यकतर्फ विवेक देवकोटा र दलिततर्फ ध्रुवराज विश्वकर्मा उम्मेदवार रहेका छन् । राप्रपाबाट अन्यतर्फ हेमजंग गुरुङ, महिलातर्फ नानु नगरकोटी, अपाङ्गता/अल्पसंख्यकतर्फ भरतमणि भट्ट र दलिततर्फ पूर्णबहादुर विश्वकर्मा उम्मेदवार छन् ।
नेपाल मजदुर किसान पार्टी (नेमकिपा) बाट महिलातर्फ कृष्णलक्ष्मी दुवाल, अपाङ्गतर्फ हिमालयश्वर मुल, अन्यतर्फ श्रीकृष्ण महर्जन र दलिततर्फ संगीता नेपाली उम्मेदवार छन् ।
-1732613116.jpeg)
