रौतहट । नेकपा एमालेका सचिव तथा मधेश प्रदेश इन्चार्ज योगेश भट्टराईले एमाले नेतृत्वको सरकारका पालामा थालेका विकासका योजनाहरू गठबन्धन सरकारले ठप्प पारेको बताएका छन् ।
रौतहटको गरुडामा शुक्रबार आयोजित राष्ट्रिय युवासंघको जिल्ला भेलालाई सम्बोधन गर्दै सचिव भट्टराईले देशलाई समृद्ध बनाउने अभियानअन्र्तगत एमाले सरकारको पालामा ल्याएको विकासका योजना गठबन्धनको सरकारले ठप्प बनाएको बताए ।
देशमै अहिले विकासका कामहरू ठप्प अवस्थामा रहेको सचिव भट्टराईले बताए । युवाहरूलाई स्वरोगार बनाउने, औद्योगिक क्षेत्रको विकासका योजनाहरू, भौतिक पूर्वाधारका विकासका योजनाहरू जस्ता काम अहिले ठप्प रहेको सचिव भट्टराईले बताए । ‘अहिलेको अवस्थामा अन्य दलहरू एकातर्फ छन् भने नेकपा एमाले मात्रै एकातर्फ छ तर पनि नेकपा एमाले आफ्नो विचारमा उभिएको पार्टी भएकाले सबैको भरोसाको पार्टी बनेको छ,’ पूर्व मन्त्री समेत रहेका भट्टराईले भने ।
नेकपा एमाले सबै जाति र सबै धर्मको एकताको पक्षमा रहेको बताउदै उनले थपे, ‘नेकपा एमाले अहिले तराई–मधेशको भरोसाको पार्टी बनेको र अर्को निर्वाचनमा मधेशका एमालेमय बन्नेछ ।’ उनले पार्टी विभाजनलाई मेट्दै रौतहट बिस्तारै पुरानै अवस्थामा पुगिरहेको बताए ।
राष्ट्रिय सभाको निर्वाचनको कोशी प्रदेशको मत परिणामले गठबन्धनको सरकारमा अन्तर्विरोध भएको बताउँदै उनले बिस्तारै गठबन्धन भत्किने ठोकुवा गरे । एमालेको जनमत अझै बढ्दै गएको उल्लेख गर्दै उनले देशको समृद्धिका लागि आउँदो निर्वाचनमा संघ, प्रदेश र स्थानीय तहमा एमाले जित्नुपर्ने बताए ।
कार्यक्रममा एमाले पोलिटब्युरो सदस्य तथा रौतहट इन्चार्ज पुरुषोतम पौडेल, केन्द्रीय सदस्य उद्धव रेग्मी, अजयकुमार गुप्ता, रेखा झा लगायतले युवाको परिचालनबारे आ–आफ्नो धारणा राखेका थिए । आउँदो माघ २५ र २६ गते नेकपा एमाले रौतहटको जिल्ला अधिवेशन हुँदैछ ।
अधिवेशनलाई भव्य रूपमा सफल बनाउन युवा परिचालनका लागि युवासंघको शुक्रबार बैठक राखिएको थियो । बैठक युवासंघ रौतहटका अध्यक्ष मुन्ना यादवको अध्यक्षतामा बसेको थियो । जिल्ला अधिवेशनका लागि आज शनिबार १८ वटै पालिकामा प्रतिनिधि चयन हुँदैछ । अधिवेशनको उद्घाटन नेकपा एमालेका अध्यक्ष केपी शर्मा ओलीले गर्ने कार्यक्रम छ ।
-1732613116.jpeg)
