कास्की । पोखरामा जारी आहारारा पोखरा गोल्डकप फूटबलमा थ्री स्टार क्लब प्रतियोगिताको उपाधि नजिक पुगेको छ ।
वैकल्पिक खेलाडीका रूपमा दोस्रो हाफमा मैदान प्रवेश गरेका दीपेश घलेले गरेको एक मात्र निर्णायक गोलले थ्री स्टारलाई उपाधि नजिक पुर्याएको हो ।
पोखरा रंगशालामा आज बुधबार सम्पन्न सेमिफाइनलको पहिलो खेलमा थ्री स्टारले जावलाखेल युवा क्लबमाथि १–० को साँघुरो जीत निकाल्दै प्रतियोगिताको फाइनलमा प्रवेश गर्न सफल भयो ।
खेलको ७८औं मिनेटमा दीपेशले प्रहार गरेको बल पोष्टमा लाग्दै गोलमा परिणत भएको थियो । ‘म्यान अफ दी म्याच’ घोषित निर्णायक गोलकर्ता घले ६७औं मिनेटमा मैदान प्रवेश गरेका थिए ।
पहिलो हाफको खेलमा दुवै टोलीमा कुनै पनि गोल हुन सकेन । दोस्रो हाफमा दुवैले आक्रामक खेलका थिए । थ्री स्टार आहाराराको सफल टोली हो । थ्री स्टारले हालसम्म ५ पटक प्रतियोगिताको उपाधि जितिसकेको छ ।
जारी प्रतियोगितामा थ्री स्टारले प्रि–क्वाटर फाइनलमा आयोजक सहारा र क्वाटर फाइनलमा भुटानको पारो एफसीमाथि जीत निकालेर सेमिफाइनलमा पुगेको थियो । जावलाखेलले प्रि–क्वाटर फाइनलमा मच्छिन्द्र र क्वाटरफाइनलमा मनाङ मस्र्याङदीलाई हराएको थियो ।
खेलपछिको पत्रकार सम्मेलनमा विजेता थ्री स्टारका प्रशिक्षक विक्रम लामाले काउन्टर अट्याकमा गोल गर्ने रणनीति सफल भएको बताए । ‘जावलाखेल कम्बाइन टोली हो । त्यसैले सोहीअनुसार रणनीति बनाएका थियौं । त्यसमा सफल भयौं,’ उनले भने ।
फाइनलमा आजको खेलका कमीकमजोरी हटाउँदै उपाधि जित्ने गरी खेल्ने लामाको भनाइ थियो ।
जावलाखेलका प्रशिक्षक नरेश थापाले खेलाडीले निकै उत्कृष्ट खेल खेलेका बताए । पराजित भए पनि टोलीको प्रदर्शनबाट आफू सन्तुष्ट रहेको उनले उल्लेख गरे ।
प्रतियोगिताअन्तर्गत बिहीबार नेपाली सेनाको त्रिभुवन आर्मी क्लब र चर्च ब्वाइज युनाइटेड क्लबबीच दोस्रो सेमिफाइनलको खेल हुने आयोजक सहारा क्लब पोखराका अध्यक्ष केशवराज बरालले जानकारी दिए । भोलि बिहीबारको विजेताले उपाधिका लागि थ्री स्टारसँग प्रतिस्पर्धा गर्नेछ ।
माघ ९ गतेदेखि सञ्चालन भएको प्रतियोगिताको फाइनल खेल माघ २० गते हुनेछ । च्याम्पियन टोलीले १२ लाख १ हजार नगदसहित ट्रफी पुरस्कार प्राप्त गर्नेछन् । उपविजेता टोलीले ६ लाख १ हजार नगदसहित ट्रफी प्रदान गरिने क्लबले जनाएको छ ।
विभिन्न ५ विधामा उत्कृष्ट खेलाडीले जनही २५ हजार रुपैयाँका दरले पुरस्कार पाउनेछन् । प्रतियोगिताको सर्वोत्कृष्ट खेलाडीले १ थान स्कुटर पाउने आयोजकले जनाएको छ ।
