कास्की । विभागीय नेपाली सेनाको त्रिभुवन आर्मी क्लब पोखरामा सञ्चालन भएको २३औं संस्करणको आहा रारा पोखरा गोल्डकप फूटबल प्रतियोगिताको च्याम्पियन बनेको छ ।
पोखरा रंगशालास्थित अन्तर्राष्ट्रिय फूटबल आज सम्पन्न फाइनल खेलमा प्रतियोगिताको ५ पटकको च्याम्पियन थ्रीस्टार क्लबलाई ३–० गोलले हराउँदै आर्मी पहिलोपटक च्याम्पियन बन्न सफल भएको छ ।
यसअघि ४ पटक फाइनल पुग्दा समेत उपाधि चुम्न असफल बनेको आर्मीले पाँचौं प्रयासमा सफलता पाएको हो । यससँगै आहा रारा गोल्डकपले नयाँ च्याम्पियन पाएको छ । खेलमा आर्मीले पहिलो हाफमा १ र दोस्रो हाफमा २ गोल थप्दै सहज रूपमा थ्रीस्टारलाई पराजित गरेको छ ।
पहिलो हाफको ३९औं मिनेटमा आर्मीका कप्तान जिलेप्सीजँग कार्कीले गोल गर्दै टोलीलाई अग्रता दिलाए । मध्याह्नअघिको खेलमा १–० ले पछि परेको थ्रीस्टार दोस्रो हाफमा खेलमा फर्कन प्रयास गरे पनि असफल भयो ।
खेलको ८३औं मिनेटमा आर्मीले फत्तेमान घलेको गोलबाट अग्रता दोब्बर बनायो । इन्जुरी समयको चौथो मिनेटमा वसन्त जिम्वाले गोल गर्दै आर्मीलाई जीत दिलाए ।
च्याम्पियन बनेको आर्मीले नगद १२ लाख १ हजारसहित ट्रफी पुरस्कार पायो भने उपविजेता टोली थ्रीस्टारले नगद ६ लाख १ हजारसहित ट्रफी पुरस्कार पायो ।
आर्मीका विमल पाण्डेले प्रतियोगिताको सर्वोत्कृष्ट खेलाडी घोषित हुँदै १ थान विद्युतीय स्कुटर पाए । प्रतियोगिताको उत्कृष्ट गोलकिपर आर्मीका समित श्रेष्ठ, उत्कृष्ट रक्षक आर्मीका विमल पाण्डे, उत्कृष्ट मिडफिल्डर थ्रिस्टार क्लबका विवेक पौडेल, उत्कृष्ट फरवार्ड आर्मीका जिलेप्सीजँग कार्की तथा उत्कृष्ट प्रशिक्षक आर्मीका मेघराज केसी घोषित हुँदै उनीहरूले जनही २५ हजार र ट्रफी पुरस्कार पाएका छन् ।
प्रतियोगितामा सर्वाधिक ३ गोल गरेका आर्मीका दिनेश हेन्जनले नगद २५ हजार पुरस्कार पाए । जावलाखेल युवा क्लब प्रतियोगिताको ‘फेयर प्ले’ टोली घोषित भयो ।
प्रतियोगिताको विजेता, उपविजेता तथा विधागत रूपमा उत्कृष्ट खेलाडीलाई अखिल नेपाल फूटबल संघका अध्यक्ष पंकजविक्रम नेम्वाङ, प्रतियोगिताको मुख्य प्रायोजक हिमश्री फुड्सका निर्देशक प्रकाश केसी र किरण केसी, आयोजक सहाराका अध्यक्ष केशवराज बराल, सहारा युकेका पदाधिकारी लगायतले पुरस्कार वितरण गरेका थिए ।
सहारा क्लब पोखराको आयोजनामा माघ ९ गतेदेखि सञ्चालन भएको प्रतियोगितामा १ विदेशीसहित १२ टोलीले उपाधिका लागि प्रतिस्पर्धा गरेका थिए ।
