नवलपुर । नवलपरासी (बर्दघाट–सुस्तापूर्व)को गैंडाकोटमा आयोजित तिलकप्रसाद सापकोटा स्मृति अन्तर मावि जिल्लास्तरीय नकआउट फूटबल प्रतियोगिताको उपाधि गैंडाकोटको अक्सफोर्ड कलेजले जितेको छ ।
स्व. तिलकप्रसाद सापकोटाको स्मृतिमा गैंडाकोटस्थित कालिका संस्कृत विद्यापीठको स्वतन्त्र विद्यार्थी युनियनले आयोजना गरेको प्रतियोगितामा २–१ गोल अन्तरले विजयी हुँदै अक्सफोर्डले उपाधि जितेको हो ।
माघ १८ गतेदेखि गैंडाकोटमा आयोजित १६ विद्यालय सहभागी प्रतियोगिताअन्तर्गत आज शुक्रबार भएको फाइनल खेलमा अक्सफोर्डले जनक नमूना माविलाई २–१ गोलले हराएको हो । प्रतियोगिताको सुरुआती समयमा अक्सफोर्डका राजीव तामाङले गोल गर्दै लिएको अग्रता दोस्रो हाफमा जनकका विकास सारुले गोल गरेपछि बराबरी भएको थियो ।
निर्धारित समयमा दुवै तर्फबाट १–१ गोल गरी खेल बराबरी पारेपछि प्रतियोगितामा अतिरिक्त समय थप गरिएको थियो ।
थप गरिएको अतिरिक्त समयको सदुपयोग गर्दै अक्सफोर्डका रिजन कँडेलले गोल गरेर उपाधि रक्षा गर्न सफल भए । अक्सफोर्ड कलेजले उपाधिसँगै ६६ हजार ६६६ जितेको छ । प्रतियोगिताको उपविजेतामा चित्त बुझाएको जनक नमूना माविले ३३ हजार ३३३ हात पारेको छ ।
प्रतियोगिताको समापन समारोहमा मन्तव्य राख्दै पूर्व मन्त्री एवं नेपाली कांग्रेस गण्डकी प्रदेशका महामन्त्री विष्णुप्रसाद लामिछानेले स्व. सापकोटाको व्यक्तित्वको चर्चा गर्दै उनको नाम लिँदा गर्वले छाती चौडा हुने बताए ।
स्व. सापकोटाले व्यक्तिगत रूपमा प्राप्तिको आशा नगरी मुलुकको परिवर्तनका लागि जीवन नै समर्पित गरेको भन्दै राजनीति, सामाजिक र शैक्षिक क्षेत्रमा परिवर्तनका लागि ठूलो योगदान पुर्याएको लामिछानेले स्मरण गरे ।
प्रतियोगिताको समापनका अवसरमा स्व. सापकोटाका सुपुत्र केशवप्रसाद सापकोटाले बुवाको स्मृति दिवस पारेर आयोजना गरिएको यस प्रतियोगितालाई बर्सेनि सञ्चालन गर्नका लागि सहकार्य गर्ने बताए । हरेक वर्ष माघ १७ गते प्रतियोगिता उद्घाटन गर्ने गरी तिलकप्रसाद सापकोटा ट्रष्टले स्ववियुसँग सहकार्य गर्दै अगाडि बढ्ने उनको भनाइ थियो ।
प्रतियोगिताको पहिलो पुरस्कार राशि ६६ हजार ६६६ रुपैयाँ स्व. सापकोटाको परिवारले प्रायोजन गरेको थियो । प्रतियोगितामा गैंडाकोट नगरपालिका उपप्रमुख शान्ति कोइराला, कालिका संस्कृत विद्यापीठका अध्यक्ष ओमप्रसाद सापकोटा, नेपाल विद्यार्थी संघ नवलपुर जिल्ला कमिटी अध्यक्ष हरि सुवेदीसहितका व्यक्तिले स्व. सापकोटाको व्यक्तित्वको चर्चा गरेका थिए ।
