काठमाडौं । एसीसी वुमन्स प्रिमियर कपअन्तर्गत नेपालले पहिलो खेलमा जीतका लागि ९४ रनको लक्ष्य पाएको छ । नेपाललाई हङकङले लक्ष्य दिएको हो ।
मलेसियाको सेलाङ्गुर टर्फ क्लबमा नेपाली टोलीकी कप्तान इन्दु बर्माले टस जितेर पहिला फिल्डिङ गर्ने निर्णय लिइन् । हङकङले निर्धारित २० ओभरको खेलमा ८ विकेट गुमाएर ९३ रन बनायो ।
हङकङका लागि कप्तान चान का यिङ क्यारीले सर्वाधिक २१ रन बनाइन् । उनले ३१ बल खेल्ने क्रममा तीन चौका प्रहार गरिन् । मर्यम बिबीले १९, यास्मिन दस्वानीले १५ तथा नताशा माइल्सले ११ रन बनाइन् ।
बलिङतर्फ नेपालकी पूजा महतो र रुविना क्षेत्रीले २/२ तथा कविता जोशी र सीता रानामगरले १/१ विकेट लिइन् । नेपाली टोलीमा इन्दू बर्मा (कप्तान), अप्सरी बेगम, डली भट्ट, कविता जोशी, कविता कुँवर, काजोल श्रेष्ठ, रुविना क्षेत्री, सीता रानामगर, सम्झना खड्का, पुजा महतो र रोमा थापा रहेका छन् ।
जारी प्रतियोगितामा नेपाल समूह ‘डी’मा रहेको छ । समूहमा हङकङ, भुटान र माल्दिभ्स पनि छन् । एसीसी वुमन्स प्रिमियर कपमा १६ देश सहभागी छन् । सहभागी टोलीलाई ४ समूहमा विभाजन गरिएको छ ।
समूह ‘ए’मा कुवेत, म्यान्मार, सिंगापुर र थाइलैण्ड छन् । समूह ‘बी’मा चीन, जापान, ओमान र युनाइटेड अरब इमिरेट्स (यूएई) छन् । समूह ‘सी’मा बहराइन, इन्डोनेसिया, कलेसिया र कतार रहेका छन् ।
हरेक समूहका शीर्ष २ टोली क्वाटरफाइनलमा प्रवेश गर्नेछन् । फाइनल खेल्ने २ टोलीले यसै वर्ष वुमन्स एसिया कप खेल्न पाउनेछन् । सेमिफाइनल पुग्ने ४ टोली आगामी वर्ष एसीसी इमर्जिङ टिम्स एसिया कपमा सहभागी हुन पाउने छन् ।
