काठमाडौं । २३ वर्षमुनिको नेपाली राष्ट्रिय फूटबल टोली र चीनको प्रान्तीय टोली छिङ हाई युसुबीच आज शनिबार भएको मैत्रीपूर्ण फूटबल खेलमा नेपाल विजयी भएको छ ।
चिनियाँ नयाँ वर्षको उपलक्ष्यमा त्रिपुरेश्वरस्थित दशरथ रंगशालामा आयोजित उक्त खेलमा तिब्बतबाट नेपाल भ्रमणमा आएका चीनको प्रान्तीय टोली छिङ हाई युसु टोलीमाथि नेपालले ५–१ को जीत निकाल्यो ।
नेपालका लागि समिर तामाङले २ गोल गरे भने सञ्जीव विष्ट, छिरिङ लामा र निराजन धामीले समान १–१ गोल गरे । सञ्जीवले खेलको दोस्रो मिनेटमै गोल गर्दै नेपाललाई पहिलो अग्रता दिलाए । खेलको ३९औं मिनेटमा समिरले गोल गरेपछि नेपालले खेलको पहिलो हाफमा नै २–० गोलको अग्रता बनाउन सफल भयो ।
त्यसपछि खेलको ५४औं मिनेटमा समिरले व्यक्तिगत दोस्रो तथा टोलीका लागि तेस्रो गोल गरे । खेलको ६३औं मिनेटमा छिरिङको गोलमा नेपालले ४–० गोलको अग्रता बनायो । खेलको ७५औं मिनेटमा निराजनले गोल गर्दै नेपाललाई ५–० को गोलको अग्रता बनाए ।
खेलको ७८औं मिनेटमा चीनका पेङ्गकोउले १ गोल फर्काए । त्यसपछि खेलको निर्धारित समयसम्म गोल हुन सकेन र नेपालले चीनविरुद्ध ५–१ को जीत निकाल्न सफल भयो ।
चिनियाँ नयाँ वर्षको उपलक्ष्यमा राष्ट्रिय खेलकुद परिषद् (राखेप) र नेपालस्थित चिनियाँ राजदूतावासको संयुक्त आयोजनामा भएको खेलमा युवा तथा खेलकुदमन्त्री डिगबहादुर लिम्बू, राष्ट्रिय सभाका अध्यक्ष गणेशप्रसाद तिमल्सिना, नेपालका लागि चिनियाँ राजदूत चेन सोङ, राष्ट्रिय खेलकुद परिषद्का सदस्य सचिव टंकलाल घिसिङ लगायतको उपस्थिति थियो ।
मैत्रीपूर्ण खेल सुरु हुनुअगाडि विभिन्न सांस्कृतिक झाँकी पनि प्रदर्शन गरिएको थियो ।
