किमाथांका । जिल्ला अस्पताल संखुवासभामा १० वर्षमुनिका बालबालिकाको निःशुल्क उपचार सुरु भएको छ ।
आज मंगलबारदेखि सुरु भएको सेवामा १० वर्षमुनिका बालबालिकाको निःशुल्क विशेषज्ञ सहितको उपचार गरिने अस्पताल स्रोतले जनाएको छ ।
बालबालिका लक्षित निःशुल्क विशेषज्ञ सेवाको आजदेखि औपचारिक रूपमा सुरुआत गरिएको अस्पतालका मेडिकल अधिकृत प्रनव जयरुले जानकारी दिए । उनका अनुसार निःशुल्क उपचार प्राप्त गर्ने बिरामी बालबालिकालाई जीवन बीमाले तोके बमोजिमको औषधि समेत निःशुल्क उपलब्ध गराइनेछ ।
निःशुल्क रूपमा आकस्मिक सेवा लिनुपर्ने बिरामी बालबालिकाको हकमा स्थायी बसोबास भएको विवरण खुल्ने सरकारी कागजात हुनुपर्ने जयरुले जानकारी दिए ।
कोशी प्रदेश सरकारले प्रतिस्थापन विधेयकमार्फत १० वर्षमुनिका बालबालिकाको निःशुल्क उपचारको योजना ल्याएको हो । बालबालिकाको निःशुल्क उपचार सुविधा ५० शय्या भएका अस्पतालमा मात्र लागू भएको छ ।
जिल्ला अस्पतालमा हार्डजोर्नी विशेषज्ञ, बालरोग, सामान्य शल्यक्रिया, फिजियोथेरापी लगायत सेवा सञ्चालनमा छन् । जिल्ला अस्पतालको ५० शय्याको भवन समयमा निर्माण नहुँदा विक्रम संवत् २०३३ सालमा स्थापना भएको ३७ शय्या क्षमता भएको पुरानो भवनबाट सञ्चालन हुँदै आएको छ ।
अस्पतालमा जिल्लाका १० स्थानीय तहका साथै छिमेकी जिल्ला भोजपुरका अधिकांश सेवाग्राही उपचारका लागि आउने गरेका जयरुले बताए । यसअघि प्रदेश सरकारले नोबेल शिक्षण अस्पताल, विराट शिक्षण, हाम्रो अस्पताल र प्रादेशिक अस्पतालसँग सम्झौता गरी उक्त उमेर समूहका बालबालिकाको निःशुल्क उपचार सुरु गरेको थियो ।
