पोखरा । १७ औं पोखरा अन्तर्राष्ट्रिय म्याराथनको उपाधि केन्याली धावक स्टेफन केसगोईले जितेका छन् ।
शनिबार भएको म्याराथनमा केसागोईले निर्धारित दूरी (४२.१९५ किलोमिटर) २ घण्टा २० मिनेट ७ सेकेन्डमा पूरा लगातार दोस्रो पटक उपाधि जितेका हुन् । अघिल्लो संस्करणमा उनले निर्धारित दूरी २ घण्टा १९ मिनेट ४३ सेकेन्डमा पार गर्दै उपाधि हात पारेका थिए ।
उपाधिसँगै केसागोईले ५ लाख रुपैयाँ पाएका छन् । भूतपूर्व खेलाडी मञ्चले आयोजना गर्दैै आएको म्याराथनको १७ औं संस्करणको अन्य स्पर्धामा पनि केन्याली धावककै वर्चश्व रह्यो ।
म्याराथनमा दोस्रो स्थान पनि केन्याकै जुलियस मोरियकीले प्राप्त गरे । उनले निर्धारित दूरी २ घण्टा २० मिनेट ३७ सेकेण्ड पूरा गर्दै ३ लाख रुपैयाँ प्राप्त गरे ।
नेपाली सेनाका होमलाल श्रेष्ठले २ घण्टा २५ मिनेट १४ सेकेण्डमा दूरी पूरा गरेर तेस्रो भए । उनले २ लाख रुपैयाँ पाए ।
अघिल्लो संस्करणमा दोस्रो भएका केन्याली धावक सिमिओन किप्लागातो यसपटक भने २ घण्टा २९ मिनेट ३५ सेकेन्डमा दूरी पार गरेर चौथो भए । उनले ३० हजार रुपैयाँ प्राप्त गरे ।
महिला हाफ म्याराथनमा पछाईंको ह्याट्रिक
महिला हाफ म्याराथनको उपाधि नेपाल पुलिसकी राजपुरा पछाईंले जितिन् । निर्धारित २१.०९७ किलोमिटर उनले १ घण्टा २१ मिनेट ११ सेकेन्डमा पूरा गरेर उपाधि जितेकी हुन् । पछाईंको पोखरा अन्तर्राष्ट्रिय म्याराथन प्रतियोगितामा लगातार तेस्रो पटक उपाधि हो ।
विभागीय टिम एपीएफकी वृन्दा श्रेष्ठले निर्धारित दूरी १ घण्टा २६ मिनेट २८ सेकेन्डमा पूरा गरेर दोस्रो भइन् भने त्रिभुवन आर्मीकी पूर्णलक्ष्मी न्यौपानेले निर्धारित दूरी १ घण्टा ३१ मिनेट ४ सेकेन्डमा पूरा गर्दै तेस्रो भइन् ।
महिला हाफ म्याराथन विजेताले १ लाख ५० हजार रुपैयाँ, दोस्रोले १ लाख रुपैयाँ र तेस्रोले ७५ हजार रुपैयाँ प्राप्त गरे । म्याराथनमा पुरुष, हाफ महिलासहितमहिला पुरुष दौड १० किलोमिटर, विद्यालयस्तरीय छात्रछात्रा ५ किलोमिटर दौड, महिला पुरुष ह्विलचियर र दृष्टिविहीन दौडसँगै ‘रन फर फन’ इभेन्ट भएका थिए ।
