काठमाडौं । फागुन ११ देखि १९ गतेसम्म हुने ‘केपी ओली कप २०८०’ फूटबल प्रतियोगिताका विजेतालाई ११ लाख रुपैयाँ प्रदान गरिने भएको छ ।
राष्ट्रिय युवासंघ नेपालले भोलिदेखि आयोजना गर्न लागेको अखिल नेपाल फूटबल संघ (एन्फा) प्रतियोगिताका द्वितीयलाई ५ लाख, उत्कृष्ट खेलाडीलाई १ लाख, उत्कृष्ट गोलरक्षक, उत्कृष्ट गोलकर्ता र उत्कृष्ट उदीयमान खेलाडीलाई ५०/५० हजार रुपैयाँ प्रदान गरिने जनाइएको छ ।
खेलमा नेपालका ७ वटा ‘ए’ डिभिजन, २ विदेशी तथा १ आयोजक गरी १० टीमले सहभागिता जनाउने छन् । नेपालका ७ टीममा जाउलाखेल युथ क्लब, न्यूरोड टीम (एनआरटी), थ्रीस्टार, नेपाल पुलिस, त्रिभुवन आर्मी, चर्च ब्वाइज युनाइटेड, मच्छिन्द्र क्लब, २ विदेशी क्लबमा दिल्ली एफसी, पश्चिम बङ्गाल क्लब र आयोजक केपी एफसी क्लबले सहभागिता जनाउने केपी ओली कपका संयोजक सुमन पुरीले जानकारी दिए ।
उनका अनुसार खेलको नेकपा एमालेका अध्यक्ष केपी शर्मा ओलीले उद्घाटन गर्ने कार्यक्रम छ । समारोहमा पूर्व राष्ट्रपति विद्यादेवी भण्डारी, अन्य विशिष्ट व्यक्ति, एन्फा, राष्ट्रिय खेलकुद परिषद्का प्रतिनिधि, खेलाडी र कलाकार रहनेछन् । उद्घाटन समारोहमा ख्यातिप्राप्त कलाकारद्वय प्रकाश दुतराज र दीक्षा कार्कीको विशेष प्रस्तुति रहने पुरीले आज बिहीबार आयोजित पत्रकार सम्मेलनमा जानकारी दिए ।
प्रतियोगिताको ११ देखि १६ गतेसम्म एन्फा सातदोबाटो हुनेछ भने १७ गते हुने सेमिफाइनल र १९ गते हुने फाइनल प्रतियोगिता दशरथ रंगशाला त्रिपुरेश्वरमा हुनेछ ।
‘सबल राष्ट्र निर्माणका लागि स्वस्थ सेवा, स्वस्थ युवाका लागि खेलकुद’ भन्ने नाराका साथ हुन लागेको फूटबल प्रतियोगिताले खेलकुदको प्रवर्द्धन, खेलाडी उत्पादन, रोजगारसँगैै आर्थिक समृद्धिको आधारसँग जोड्ने अभियानले आयोजना गर्न लागिएको संघले जनाएको छ ।
खेलकुद क्षेत्रमा ‘समस्या होइन, सम्भावना’ छ भन्ने कुरालाई उजागर गर्दै त्यसलाई नेतृत्व गर्न सक्ने संगठनको रूपमा केपी ओली कप गत वर्षदेखि सुरुआत गरिएको थियो ।
