मोरङ । जिल्लामा फागुन १३ गतेदेखि दादुरा–रुवेला विरुद्धको खोप लगाइने भएको छ ।
स्वास्थ्य कार्यालय मोरङले आज राष्ट्रिय खोप कार्यक्रम र दादुरा–रूबेला खोप अभियान सञ्चालनबारे जिल्ला खोप समन्वय समिति, सञ्चारकर्मी र सरोकारवालाहरूको बैठक तथा छलफल कार्यक्रममा फागुन १३ गतेदेखि खोप लगाइने जानकारी दिइएको छ ।
मोरङका १७ वटै स्थानीय तहका १५९ वडाका ९ महिनादेखि १५ वर्षसम्मका २ लाख ८१ हजार २६३ जनालाई खोप लगाइने स्वास्थ्य कार्यालय मोरङका प्रमुख डा. सुरेश मेहताले बताए । उनका अनुसार ९ महिनादेखि ५९ महिनाभित्रमा ८० हजार ४५५ र ५ वर्षदेखि १५ वर्षसम्मका २ लाख ८०८ गरी २ लाख ८१ हजार २६३ जनालाई खोप लगाइने भएको हो ।
मोरङमा १ हजार ५८८ खोप केन्द्र, ३ हजार १७० स्वास्थ्यकर्मी र ४ हजार ७६४ जना स्वयंसेवक परिचालन हुने बताइएको छ । दादुरा रुवेला विरुद्धको राष्ट्रिय अभियान फागुन १३ देखि चैत ७ गतेसम्म भए पनि मोरङमा चैत २ गतेभित्र सम्पन्न गर्ने लक्ष्य राखिएको छ ।
जहदा गाउँपालिकाबाट अभियानको शुभारम्भ गरिने कार्यालय प्रमुख डा. मेहताले बताए । मोरङमा पहिलो चरणमा मिक्लाजुङ्ग, लेटाङ्ग, केराबारी, वेलबारी, सुन्दरहरैचा, विराटनगर, जहदा, कटहरी, बूढीगंगा, ग्रामथान र फागुन २९ गतेदेखि दोस्रो चरणमा धनपालथान रङ्गेली सुनवर्षी रतुवामाई उर्लावारी कानेपोखरी र पथरीशनिश्चरेमा अभियान सञ्चालन हुने उनले बताए ।
दक्षिणपूर्वी एसियाबाट सन् २०२६ सम्ममा दादुरा–रुवेला निवारण गर्ने लक्ष्य राखिएको छ । सोही अनुसार राष्ट्रियव्यापी अभियान सुरु गर्न लागिएको हो । यसअघि नेपालले सन् २०१९ र पछि सन् २०२३ मा निवारणको लक्ष्य लिए पनि सम्भव नभएपछि सन् २०२६ लाई निर्धारण गरिएको प्रदेश स्वास्थ्य निर्देशनालय धनकुटाका खोप अधिकृत उदेश श्रेष्ठले बताए । उनका अनुसार सन् २०२२/२३ मा नेपालको धेरै जिल्लामा दादुरा रुवेलाका बिरामी देखा परी महामारी फैलिएपछि २०२६ लाई लक्ष्य निर्धारण गरिएको छ ।
दादुरा रूवेला निवारणका लागि दादुरा खोपको दुवै (पहिलो र दोस्रो) मात्राको प्रगति सबै तहमा ९५ प्रतिशतभन्दा धेरै भएको हुनुपर्ने आधार र शर्तहरू रहेको छ । दादुरा–रुवेला विरुद्धको खोपको राष्ट्रिय अभियानमा सबै पक्षको सहयोग आवश्यक भएको जिल्ला समन्वय समिति मोरङका प्रमुख अजम्वर राई, शिक्षा विकास तथा समन्वय इकाई मोरङका प्रमुख टंक गौतम, निजी अस्पताल सञ्चालकको संघ अफिनका कोशी प्रदेश अध्यक्ष डा. शंकर अधिकारी लगायतले बताए ।
