काठमाडौं । राष्ट्रियसभा अध्यक्ष गणेशप्रसाद तिमिल्सिनाले आधुनिक प्रविधिको सदुपयोग गरी गुणस्तरीय एवं व्यावसायिक चलचित्र निर्माण गरी विश्व बजारसम्म पुर्याउनुपर्ने समय आएको बताएका छन् ।
नेपाली चलचित्रकर्मीको अन्तरराष्ट्रिय सञ्जालको प्रथम साधारण सभाका अवसरमा आज बिहीबार आयोजित ‘सिमानाभन्दा परः नेपाली चलचित्र’ विषयक अन्तर्क्रिया कार्यक्रममा अध्यक्ष तिमिल्सिनाले बदलिँदो विश्व परिवेशलाई ध्यान दिँदै नेपाली सिने उद्योगलाई अन्तर्राष्ट्रियकरण गर्न आग्रह गरे ।
वरिष्ठ चलचित्रकर्मी नीर शाहले कलाकर्मीबीचको अविश्वास र बेमेलका कारण चलचित्र व्यवसाय अपेक्षा गरिए अनुसार फस्टाउन नसकेको उल्लेख गर्दै व्यावसायिक सफलताका लागि लगनशील भई एकताबद्ध रूपमा अघि बढ्न चलचित्रकर्मीसँग अनुरोध गरे ।
सञ्जालका अध्यक्ष लब प्याकुरेलले नेपाली युवाको विदेशिने क्रम बढेसँगै राम्रा चलचित्रले पनि बजार पाउन नसकेका सन्दर्भमा नेपाली भाषीको उल्लेख्य उपस्थिति भएको विश्व बजारसम्म नेपाली चलचित्र पुग्नुपर्ने धारणा व्यक्त गरे ।
सो अवसरमा नेपाली चलचित्र उद्योगमा उल्लेख्य योगदान पुर्याउने गीतकार डा. कृष्णहरि बराल, अग्रज एवं वरिष्ठ चलचित्रकर्मी भुवन चन्द, गौरी मल्ल, करिष्मा मानन्धर, राजकुमार राई, उद्धव पौडेल, रवीन्द्र खड्का, मुकुन्द भट्टराई लगायतका व्यक्तित्वलाई सम्मान गरिएको थियो ।
सो अवसरमा सञ्जालका नवनिर्वाचित अध्यक्ष प्याकुरेल, उपाध्यक्षद्वय प्रदीपलाल श्रेष्ठ र लक्ष्मण सुवेदी, महासचिव रमेश कोइराला, सचिव भीष्मराज फुलारा, कोषाध्यक्ष थण्डबहादुर अधिकारी लगायत १२ सदस्यीय पदाधिकारी एवं कार्यकारी सदस्यलाई प्रमाणपत्र प्रदान गरिएको थियो ।