पर्वत । लामो समयदेखि बक्यौता रकम नतिरेपछि पर्वतको कुश्मा नगरपालिका क्षेत्रका सडकबत्तीको ‘लाइन’ काटिएको छ ।
नेपाल विद्युत् प्राधिकरण पर्वत वितरण केन्द्रले कुश्मा नगरपालिका अन्तर्गतका सबै सडकबत्ती आज सोमबार काटिदिएको हो ।
नगरपालिकाले २०७५ सालदेखि सडक बत्ती, नगरपालिका अन्तर्गत रहेको प्रहरी बिट, स्वास्थ्य इकाइजस्ता ठाउँको महसुल नबुझाएको बताइएको छ । नगरपालिका ग्राहक भएर जोडिएका सडकबत्ती लगायत महसुल रकम पटक–पटक माग गर्दा पनि भुक्तानी नपाएपछि लाइन नै काट्नुपर्ने बाध्यता भएको नेपाल विद्युत् प्राधिकरण पर्वत वितरण केन्द्रका लेखा प्रमुख गोविन्द सुवेदीले जानकारी दिए ।
कुश्मा नगरपालिकाका कर्मचारी र जनप्रतिनिधिसँग पटक–पटक छलफल गरेर भुक्तानीका लागि ताकेता गरे पनि भुक्तानी नभएपछि अन्तिम विकल्पका रूपमा लाइन काट्न थालेको उनले बताए । जनप्रतिनिधि र नगरका कर्मचारी प्रशासनसँग छलफल गर्दा जनप्रतिनिधिहरू सकारात्मक भए पनि कर्मचारी प्रशासन भुक्तानी गर्न तयार नभएको उनले बताए । विद्युत् प्राधिकरणका अनुसार सडकमा जडान गरिएको बिजुलीबापत कुश्माले ७४ लाख रुपैयाँभन्दा बढी भुक्तानी दिन बाँकी रहेको छ ।
कुश्मा नगरपालिका र विद्युत् प्राधिकरणबीच ४ वर्षअघि सडकबत्ती राख्ने सम्झौता भएको थियो ।
सम्झौताअनुसार सडकबत्ती बापतको रकम नगरपालिकाले भुक्तानी गर्ने उल्लेख गरिएको छ । कुश्मा–४, ५, ६, ७, ८ र ९ तथा वडा नम्बर २ का केही भागमा सडकबत्ती विस्तार गरिएको छ । झण्डै १५० भन्दा बढी ठाउँमा सडकबत्ती विस्तार गरिएको थियो ।
गत असोज १० गते सम्पन्न दशौं नगरसभाले विद्युत् महसुल भुक्तानीका लागि ६५ लाख विनियोजन गरेको भए पनि प्रमुख प्रशासकीय अधिकृत र लेखा शाखाले भुक्तानी नदिएको वितरण केन्द्रको आरोप रहेको छ । प्राधिकरणले लाइन काटेका सडकबत्ती बक्यौता रकम भुक्तानी र नयाँ सम्झौता भएपछि पुनः जडान गरिने लेखा प्रमुख सुवेदीले जानकारी दिए ।
कुश्मा नगरपालिकाका प्रमुख प्रशासकीय अधिकृत विष्णु तिवारीले बजेट अभाव भएका कारण महसुल भुक्तानी रोकिएको बताए । उनले अहिले आधार रकम भुक्तानी गरिने र आधा रकम अर्को आर्थिक वर्षमा भुक्तानी गर्ने तयारी भइरहेको जानकारी दिए । १ हप्ताभित्र महसुल भुक्तानी गर्ने उनको भनाइ छ ।
यति लामो समयसम्म बक्यौता रहेको रकम १ हप्ताभित्र भुक्तानी गर्छौं लाइन नकाटिदिनुहोस् भनेर वितरण केन्द्र र नेपाल विद्युत् प्राधिकरण केन्द्रीय कार्यालयमा पनि अनुरोध गरेको उनको भनाइ छ । उनका अनुसार नगर कार्यपालिकाको कार्यालयको विद्युत् महसुल रकम भने नियमित भुक्तानी भइरहेको छ ।
