कास्की । नयाँ वर्षका अवसरमा ‘पर्यटन, संस्कृति र खाना’को नारासहित पोखराको फेवाताल किनारमा फेवा नव वर्ष महोत्सवको १९औं संस्करण हुने भएको छ ।
होटल संघ पोखराले नेपाली नयाँ वर्ष धुमधामका साथ मनाउन र आन्तरिक तथा बाह्य पर्यटक आकर्षित गर्न विविध सांस्कृतिक कार्यक्रमसहित महोत्सव गर्न लागेको हो ।
चैत २९ गतेदेखि आगामी वैशाख १ गतेसम्म पर्यटकीय क्षेत्र ड्यामसाइडदेखि हल्लन चोकसम्मको ३ किलोमिटर सडक क्षेत्रमा महोत्सव हुने आयोजक होटल संघ पोखराका अध्यक्ष लक्ष्मण सुवेदीले जानकारी दिए ।
उनका अनुसार नव वर्ष महोत्सवलाई भव्य बनाउने तयारी भइरहेको छ । महोत्सवको प्रमुख उद्देश्य नेपाली मौलिक संस्कृतिको संरक्षण र परम्परागत नेपाली खानाको प्रवद्र्धन गर्नु हो । विविध सांस्कृतिक झाँकी, नृत्य र खानाका स्टल महोत्सवमा राखिने अध्यक्ष सुवेदीको भनाइ छ ।
‘नेपालका मुख्य शहरमा अंग्रेजी नयाँ वर्ष धुमधामका साथ मनाउने गरिएकामा नेपाली नयाँ वर्ष पनि उत्तिकै उल्लासका साथ मनाउन महोत्सवलाई निरन्तरता दिइएको हो,’ अध्यक्ष सुवेदीले भने, ‘पर्यटनको राजधानी घोषणापछि पहिलोपटक पोखरामा हुन लागेको यस महोत्सवमा स्वदेशी तथा विदेशी पर्यटकलाई मनोरञ्जन प्रदान गर्नेछौं ।’
महोत्सव आन्तरिक र बाह्य गरी ३ लाख पर्यटकलाई अवलोकन गराउने आयोजकको लक्ष्य छ । महोत्सव तयारीका लागि विभिन्न २१ वटा समिति र क्षेत्रीय संयोजक गठन गरिएको छ । सो अवसरमा होटल संघ पोखरा मातहतका होटलहरूले प्रकाशित गरेको दररेटमा २० प्रतिशतसम्म छुट प्रदान गरिने निवर्तमान अध्यक्ष विकल तुलाचनले बताए ।
महोत्सवका आकर्षणहरूमा परम्परागत नेपाली खानाको प्रवद्र्धन, सांस्कृतिक झाँकी, लोकदोहोरी, पप कन्सर्ट, स्थानीय कलाकारद्वारा सांस्कृतिक नृत्य, हास्य व्यंग्य प्रहसन र पर्यटक दौड प्रतियोगिता लगायत रहेका छन् ।
कोभिड–१९ पछि पूर्ववत् अवस्थामा सञ्चालन हुन नसकेका होटल तथा पर्यटन व्यवसाय पुरानै लयमा फर्काउन महोत्सव सफल हुने विश्वास लिइएको छ । नव वर्ष महोत्सवको प्रचार छिमेकी मुलुक भारतसहित अन्तर्राष्ट्रियस्तरमा गरिएकाले पर्यटक आगमन वृद्धि हुने पोखरा पर्यटन परिषद्का अध्यक्ष पोमनारायण श्रेष्ठले उल्लेख गरे ।
होटल संघ पोखराले २ दशकअघिदेखि नेपाली नयाँ वर्षमा महोत्सव गर्दै आएको छ । कोरोनाका कारण २ वर्ष सञ्चालन रोकिएको थियो । पर्यटन बोर्ड पोखराका निमित्त प्रमुख नवीन पोखरेलले महोत्सवले नेपाली संस्कृति संरक्षण र पर्यटन प्रवद्र्धनको साथै आर्थिक उन्नयनमा योगदान पुगेको बताए ।