काठमाडौं । अमेरिकी विदेशमन्त्री एन्टोनी ब्लिङ्केनले चीनप्रतिको दृष्टिकोणमा विशेषरूपमा माइक्रोचिप्स र हरित प्रविधिको क्षेत्रमा ब्रसेल्स र वासिङ्टनबीच बढ्दो तालमेलको शुक्रबार प्रंशसा गरेका छन् ।
‘पछिल्लो ३ वर्षमा यी मुद्दामा हाम्रो दृष्टिकोणमा समानाता बढिरहेको छ । संयुक्त राज्य अमेरिका र युरोपेली युनियन (ईयु) एकताबद्ध हुँदा र हामी सामान्य उद्देश्यका लागि काम गरिरहेका बेला यसले ठूलो फरक पार्छ,’ बेल्जियममा व्यापार र प्रविधिमाथि ईयु–अमेरिका बैठकमा सहभागी भएपछि उनले भने ।
ईयु–अमेरिका बैठक एटलान्टिकका दुवैतर्फ रहेका ठूला अर्थतन्त्रहरूका लागि आफ्ना मतभेदहरू हटाउन र व्यापार तथा प्रविधि क्षेत्रमा संयुक्त पश्चिमी स्थितिहरूको निर्माणका लागि आधार तयार गर्ने मञ्च हो ।
ईयु र अमेरिकाले वैश्विक कूल गार्हस्थ्य उत्पादन (जीडीपी) को करीब एकतिहाई हिस्सा लिन्छन् भने चीनले करीब १६ प्रतिशतको प्रतिनिधित्व गर्दछ । वैश्विक जीडीपीको गणना क्रयशक्ति समानतामा गरिन्छ । नाम मात्रको सन्दर्भमा ईयु र अमेरिकाले वैश्विक जीडीपीको करीब ४४ प्रतिशत र चीनले करीब १८ प्रतिशत योगदान गर्दछन् ।
वासिङ्टनले धेरै क्षेत्रमा अधिकांश धेरै खर्च गर्न सक्ने बेइजिङ सरकारद्वारा निर्देशित र समर्थित चिनियाँ आयातविरुद्ध थप आक्रामक अडान लिएको छ । ब्रसेल्सले भने चिनियाँ उत्पादनहरूमा निर्भरता कम गर्ने थप जोखिमरहित रणनीति अपनाइरहेको छ ।
चीन भ्रमणका क्रममा अमेरिकी अर्थमन्त्री जेनेट येलेनले शुक्रबार चीनले उद्योगका लागि दिएको अनुदानले विश्वव्यापी आर्थिक लचिलोपनका लागि खतरा निम्त्याउन सक्ने चेतावनी दिए । उनले चीनको अति क्षमताले अमेरिकी र अन्य मुलुकका कम्पनीहरूमा हुने कटौती बारेमा चिन्ता व्यक्त गरे ।
बेल्जियममा ईयु–अमेरिका बैठकपछि ईयुका व्यापार आयुक्त वाल्डिस डोम्ब्रोभ्स्कीले सेमीकन्डक्टरको क्षेत्रमा लचिलो आपूर्ति शृंखला विकासका लागि ट्रान्सएटलान्टिक सहयोगको आर्थिक दबाबमाथि प्रकाश पारे ।
‘अत्यन्त जटिल भू–राजनीतिक परिस्थितिमा ईयु र अमेरिकाले रणनीतिक सहयोगीका रूपमा एकसाथ काम गर्नु वास्तवमा महत्त्वपूर्ण छ भन्ने कुरा अत्यन्त स्पष्ट छ,’ चीनको नाम नलिई उनले भने ।
ईयुका एकाधिकार व्यापारविरोधी प्रमुख कमिश्नर मार्गरेट वेस्टेजरले ब्रसेल्सले आफ्नै अडान बनाएको र त्यसलाई अमेरिकी समकक्षीहरूसँग बैठकमा प्रस्तुत गरिएको बताए । ‘यो कसैको विरुद्धमा होइन, यसले हामीलाई बलियो बनाउँछ, यो वास्तमा सहयोग समर्थक हो र हामीले वास्तवमा डेलिभर गरेका छौं भन्ने मलाई लागेको छ,’ उनले भने ।
