धनुषा । मधेश प्रदेशका मुख्यमन्त्री सरोजकुमार यादवले प्रदेश र स्थानीय तहको प्रभावकारी समन्वयले मात्र संघीयता सबल हुने बताएका छन् ।
मुख्यमन्त्री तथा मन्त्रिपरिषद्को कार्यालय मधेश प्रदेश र नेपाल कानून समाजको संयुक्त आयोजनमा आज शुक्रबार जनकपुरधाममा सम्पन्न प्रदेश र स्थानीय सरकारको प्रभावकारी समन्वय र सहकार्यको वर्तमान अवस्था र भावी रणनीति विषयक अन्तक्र्रिया कार्यक्रममा मुख्यमन्त्री यादवले नेपालको संविधानले ३ तहको सरकारको परिकल्पना गरे पनि प्रदेश र स्थानीय तहबीचको समन्वयलाई व्याख्या नगरी संघीयतालाई नै कमजोर गर्ने काम गरेको बताए ।
संघीयतालाई बलियो पार्न स्थानीय तह र प्रदेश सरकारबीच समन्वय गर्नुको विकल्प नरहेको उनले बताए ।
संघीयता मधेशलाई नै चाहिएको उल्लेख गर्नुहुँदै मुख्यमन्त्री यादवले स्थानीय तह र प्रदेश सरकार एकजुट भएर अघि बढ्नुपर्ने बताए । स्थानीय तहको परिषद् बैठकमा समेत प्रदेशसभा सदस्यहरूलाई प्रतिनिधित्व गराउन आग्रह गर्दै मुख्यमन्त्री यादवले प्रदेशको प्रतिनिधित्व गराइए स्थानीय तहलाई फाइदै हुने बताए ।
संघीयताले मधेशको गाउँगाउँसम्म विकासको अनुभूति गराएको दाबी गर्दै मुख्यमन्त्री यादवले विगतका राजतन्त्रदेखि प्रजातन्त्रसम्म मधेशले भोगेको हविगत सबैसामु छर्लङ्ग रहेको बताए ।
कार्यक्रममा मधेश प्रदेशका मुख्य न्यायाधिवक्ता वीरेन्द्रकुमार ठाकुरले मधेश सरकारबाट निर्माण भएको कानून कार्यान्वयनको अवस्था र चुनौती तथा नेपाल कानून समाजका कार्यक्रम निर्देशक मोहनलाल आचार्यले प्रदेश र स्थानीय तहको समन्वयको अवस्था विषयक कार्यपत्र प्रस्तुत गरेका थिए ।
राष्ट्रियसभा, विधायन व्यवस्थापन समितिका पूर्व सभापति परशुराम मेघी गुरुङको अध्यक्षतामा भएको उक्त कार्यक्रममा मधेश प्रदेशका सभामुख रामचन्द्र मण्डल, गृहमन्त्री राजकुमार लेखी सहितका वक्ताले आ–आफ्नो धारणा राखेका थिए ।
कार्यक्रममा मधेश सरकारका प्रतिनिधि, स्थानीय तहका प्रतिनिधि, मधेश प्रदेश सभाका सदस्य, गैरसरकारी संस्थाका प्रतिनिधिको सहभागिता थियो ।
-1732265257.jpeg)
