धनगढी । सुदूरपश्चिम प्रदेशका प्रमुख नजिर मियाँले प्रदेशको मुख्यमन्त्री पदमा नेकपा एकीकृत समाजवादीका नेता दीर्घबहादुर सोडारीलाई नियुक्त गरेका छन् ।
प्रदेश प्रमुखले नेपालको संविधानको धारा १६८ को उपधारा (२) बमोजिम सुदूरपश्चिम प्रदेशसभा, एकीकृत समाजवादी पार्टीकोसंसदीय दलका नेता सोडारीलाई मुख्यमन्त्रीमा नियुक्त भएका हुन् ।
उनी नेकपा माओवादी केन्द्र, नेकपा एमाले, नागरिक उन्मुक्ति पार्टी (नाउपा) अध्यक्ष रञ्जिता श्रेष्ठ चौधरी पक्षका सदस्य र स्वतन्त्र सांसद डा. तारा जोशीका समर्थनमा मुख्यमन्त्रीमा नियुक्त भएका हुन् ।
यसअघि बिहीबारै उनले प्रदेश सभामा प्रतिनिधित्व गर्ने एमाले, माओवादी केन्द्र, नागरिक उन्मुक्ति पार्टी (अध्यक्ष रञ्जिता श्रेष्ठ पक्षधर) र स्वतन्त्र सदस्य डा. तारा जोशीको समर्थनमा प्रदेश प्रमुखसमक्ष मुख्यमन्त्रीको नियुक्तको लागि दाबी पेश गरेका थिए ।
प्रदेश प्रमुखले नेपालको संविधानको धारा १६८ को उपधारा (२) बमोजिम प्रदेशको मुख्यमन्त्रीमा नियुक्तिका लागि दाबी पेश गर्न गत चैत २३ गते (१० दिनको समय दिएर) गरेको आह्वानअनुसार नागरिक उन्मुक्ति पार्टी (नाउपा) का लक्ष्मणकिशोर चौधरी र कैलाश चौधरीले छुट्टाछुट्टै रूपमा वैशाख २ गते दाबी पेश गरेका थिए ।
दुवैको दाबीको आधारमा निष्कर्षमा पुग्न नसकिएको कारणसहित वैशाख ४ गते (दुई दिनको समय तोकेर) संविधानको धारा १६८ को उपधार (२) बमोजिम नै मुख्यमन्त्रीमा दाबी पेश गर्न प्रदेश प्रमुखले पुनः आह्वान गरेका थिए ।
नाउपाका प्रदेशसभा सदस्य २ समूहमा विभाजित हुँदा ४ प्रदेशसभा सदस्य रहेको एकीकृत समाजवादी सरकार गठनमा निर्णायक बन्न पुगेको छ । फलस्वरूप समाजवादीका नेता सोडारीलाई प्रदेशको मुख्यमन्त्री बन्ने बाटो खुलेको छ ।
मुख्यमन्त्रीमा दाबी पेश गरिएपछि नाउपाका रेशम पक्षधर पक्षका प्रदेशसभा सदस्य घनश्याम चौधरीले प्रदेश प्रमुखलाई भेटेर सोडारीलाई मुख्यमन्त्रीमा दलको समर्थन नरहेको जानकारी सहितको ध्यानाकर्षण पत्र बुझाएको र नाउपा दलको नाममा दिइएको पत्र कीर्ते भएको जानकारी दिए ।
प्रदेश सभामा चौथो ठूलो शक्ति नाउपामा उत्पन्न आन्तरिक किचलो साम्य हुने संकेत देखिएको छैन । किचलोकै कारण थारु समुदायको नेता प्रदेशको मुख्यमन्त्री हुने अवसर आउँदा पनि वञ्चित हुनुपरेको पार्टीका नेता कार्यकर्ताको भनाइ छ ।
अध्यक्ष रञ्जिता श्रेष्ट पक्षधरले अहिलेको केन्द्रीय गठबन्धनअनुसार जानुपर्ने अडानमा रहँदा संस्थापक संरक्षक रेशमलाल चौधरी पक्षधरले कांग्रेस सहितको गठबन्धनमा जानुपर्ने अडान राख्दै आएका छन् ।
५३ सदस्यीय प्रदेश सभाको ठूलो दल नेपाली कांग्रेसका १८, नेकपा माओवादी केन्द्रका सभामुखबाहेक १०, एमालेका १०, नाउपाका ७, एकीकृत समाजवादीका ४, राप्रपा १ र स्वतन्त्र १ सांसदको प्रतिनिधित्व छ । रिक्त १ पद (बझाङ, प्रदेशसभा (१) का लागि वैशाख १५ गते उपनिर्वाचन हुँदैछ ।
मुख्यमन्त्री नियुक्तका लागि २७ सदस्यको समर्थन आवश्यक पर्छ ।
-1732265257.jpeg)
