बसेरी । धादिङको उत्तरी क्षेत्र गंगाजमुना गाउँपालिकाले संस्कृतिमार्फत आन्तरिक तथा बाह्य पर्यटन प्रवद्र्धनको कामलाई अगाडि बढाएको छ ।
संघीय राजधानी काठमाडौंबाट ५ घण्टाको सडकमार्गबाट पुगिने गंगाजमुनाभित्र रहेको प्राकृतिक सम्पदा र विभिन्न जातजातिको संस्कृतिमार्फत पर्यटन प्रवद्र्धनको कामलाई अगाडि बढाइएको हो ।
पछिल्लो समय जथाभावी रूपमा स्थानीय निकायले मोटरबाटो खनेर पदमार्ग मासिरहेका बेला गंगाजमुनाले भने गाउँपालिका भित्रका ७ वटै वडा जोड्ने गरी नयाँ पदमार्गको कामलाई अगाडि बढाएको छ । आन्तरिक तथा बाह्य पर्यटक प्रवद्र्धन गर्न अगाडि बढाइएको ‘गंगाजमुना तीनसुरे पदमार्ग’को प्रवद्र्धनात्मक तथा अन्वेषणात्मक कार्य सुरु गरिएको छ । गंगाजमुना गाउँपालिका र ट्रेकिङ एजेन्सीज् एशोसिएशन अफ नेपाल (टान) ले सुरु गरेको ‘गंगाजमुना तीनसुरे पदमार्ग’को प्रवद्र्धनात्मक तथा अन्वेषणात्मको कामको आईतबार सोही गाउँपालिकाका अध्यक्ष भक्तबहादुर लामाले शुभारम्भ गरे ।
गोरखाको आरुघाट गाउँपालिका–४ आर्खेत बजारदेखि बुढाथुम–बाथलडाँडा–लामोपुल–बसेरी–भैंसे–तीनसुरे–पोखराडाँडा–री–गुम्दी हुँदै फूलखर्क जोड्ने पदमार्गको बुढाथुममा भव्य समारोहबीच शुभारम्भ गरिएको हो । गाउँपालिका अध्यक्ष लामा धार्मिक, सांस्कृतिक एवं प्राकृतिक महत्त्व भएको गंगाजमुनामा आन्तरिक तथा बाह्य पर्यटक प्रवद्र्धन गर्न पदमार्गलाई अगाडि बढाइएको बताउँछन् ।
यसअघि धादिङको रुवीभ्याली र गोरखाको चुमभ्यालीलाई जोड्ने वैकल्पिक पदमार्गका रूपमा पदमार्गलाई खोज, अनुसन्धान, ‘डिजाइन’, योजना निर्माण एवं प्रवद्र्धन गर्न गाउँपालिकाले टानसँग सम्झौता गरेको थियो । सम्झौतासँगै टानले गंगाजमुना तीनसुरे पदमार्गको ‘ट्रेल प्रोफाइल’ प्रतिवेदन, पदमार्ग विकास तथा प्रवद्र्धन योजना, पदमार्गको नयाँ नक्सा प्रकाशित, पदयात्रा मार्ग प्रवद्र्धनात्मक वृत्तचित्र निर्माण, पदमार्गमा पर्यटन सूचना ‘साइन बोर्ड’ राख्ने लगायतका काम गरिने टानका वरिष्ठ उपाध्यक्ष कृष्णप्रसाद दाहाल बताउँछन् ।
गंगाजमुनाभित्र ‘क्यानोनिङ’ गर्न ठूलाठूला झरना, ‘रक क्वाइबिङ’का लागि ठूलाठूला चट्टानका पहरा, पर्यटक सत्कारका लागि होमस्टे, जीपलाइन, अग्लो र लामो झोलुङ्गेपुल लगायतका पूर्वाधार रहेका छन् । गाउँपालिकामा ब्रह्माणको भजन, नेवारको लाखे नाच, लामाको परम्परागत घोडा नाच, गुरुङको घाँटु नाच, मगर, राई, घले लगायतका परम्परागत संस्कृतिको अनुभव लिन पाइन्छ ।
वरिष्ठ उपाध्यक्ष दाहालका अनुसार पछिल्लो समय टानले नयाँ पदमार्ग विस्तारको कामलाई विशेष प्राथमिकता दिँदै आएको छ ।
गंगाजमुनाका प्रमुख प्रशासकीय अधिकृत अनिल श्रेष्ठ गंगाजमुनाको पर्यटन क्षेत्रको प्रवद्र्धन गर्न चालू आर्थिक वर्ष २०८०/८१ मा ७० लाख बजेट विनियोजन गरेको बताउँछन् । ‘गंगाजमुनाबाट चुमभ्याली र रुवीभ्याली हुँदै लाङटाङ जोड्ने ‘ग्रीन ट्रेकिङ ट्रेल’लाई पालिकाले गौरवको आयोजनाका रुपमा अगाडि बढाएको छ,’ उनी भन्छन् ।
होमस्टे प्रवद्र्धन कार्यक्रमका लागि गाउँपालिकाको वडा नम्बर ३ स्थित अम्बोटे गुरुङ गाउँमा ‘होमस्टे’, वडा नम्बर ६ को भैंसे गाउँमा ‘भैंसे पाहुना घर’ निर्माण भइरहेको छ । गंगाजमुनाको पर्यटन प्रवद्र्धन गर्न ठाउँठाउँमा सूचना पाटी निर्माण, पर्यटन मन्त्रालय र पर्यटन बोर्डको सहकार्यमा ‘गंगाजमुना पर्यटन पूर्वाधार विकास योजना’ अन्तर्गत गंगाजमुना मन्दिर परिसरमा मन्दिर, भजन मण्डली, पाहुना घर, गुम्बा निर्माण लगायत काम अगाडि बढाइएको छ ।
‘कृषि, पर्यटन र पूर्वाधारः गंगाजमुना विकासको आधार’ नारा बोकेको गाउँपालिकाले अन्य गाउँपालिकाको सहकार्यमा नर्सिङ धाम–गंगाजमुना–सल्यानकोट माई मन्दिरलाई धार्मिक पर्यटन सर्किटका रुपमा विकास गर्न लागेको छ । नयाँ पदमार्ग अगाडि बढाएसँगै गंगाजमुना गाउँपालिकाको पर्यटकीय विकासमा सहयोग पुग्ने गाउँपालिकाका पर्यटन विकास संयोजक एवं वडा नम्बर ६ का वडाध्यक्ष रमेश ढकाल बताउँछन् ।
पूर्व पर्यटन व्यवसायी समेत रहेका उनी स्थानीय उत्पादन र यहाँको संस्कृतिलाई पर्यटनसँग जोड्दै समृद्ध गंगाजमुना निर्माण गर्न पदमार्गबाट सहयोग पुग्ने विश्वास व्यक्त गर्छन् । पदमार्ग भएर समुद्र सतहदेखि ५५० मिटर उचाइमा रहेको गोरखाको आर्खेत बजारदेखि ३ हजारभन्दा बढी उचाइसम्म रहेको तीनसुरे ‘भ्यू प्वाइन्ट’ सम्म पुग्न सकिन्छ ।