मिसन ८४ पूरा गर्न सत्ता गठबन्धन गरिएको हो : वरिष्ठ उपाध्यक्ष पोखरेल

सोमबार, वैशाख १७, २०८१ व्यवस्था संवाददाता

पर्सा । नेकपा एमालेका वरिष्ठ उपाध्यक्ष एवं पूर्व उपप्रधानमन्त्री ईश्वर पोखरेलले मिसन ८४ पूरा गर्न वर्तमान सत्ता गठबन्धन बनाएको जानकारी दिएका छन् ।

नेकपा एमाले पर्साको नवौं जिल्ला अधिवेशनको उद्घाटन सत्रलाई सोमबार वीरगञ्जमा सम्बोधन गर्दै उपाध्यक्ष पोखरेलले एमालेलाई सिध्याउने मनसाय राखी बनाएको सत्ता गठबन्धन नभई २०८४ सालमा हुने आम निर्वाचनमा एमालेलाई बहुमत हासिल गर्ने योजनाअनुसार वर्तमान सत्ता समीकरण बनाइएको प्रस्ट पारे ।

उनले विकासको कुरा नगर्ने, भ्रष्टाचार, विभेद र छुताछूतविरुद्ध नबोल्ने एमालेका कार्यकर्ता हुनै नसक्ने बताए । सामाजिक सद्भावलाई खलल पुर्‍याउने र हिन्दूलाई मुस्लिमसँग जुधाउनेविरुद्ध खडा हुन नसक्ने नेकपा एमालेका कार्यकर्ता हुन नसक्ने उनले प्रस्ट पारे ।

एमालेका कुनै पनि नेता वा कार्यकर्ता जातीय सद्भावलाई खल्बलाउने कार्यमा संलग्न भएमा दण्डको भागिदार हुने उनले बताए । धार्मिक, सामाजिक सदभाव र आपसी भाइचाराले मात्र मुलुक बलियो नेपाली समाज समृद्ध हुन सक्ने उनको भनाइ थियो ।

एमाले पर्साका इन्चार्ज विश्वम्बर शर्माको अध्यक्षतामा सम्पन्न कार्यक्रममा एमालेका सचिव एवं मधेश प्रदेश इन्चार्ज योगेश भट्टराईले मुलुकमा उद्योग–व्यवसायको विकास नभई समृद्धिको लक्ष्य हासिल गर्न नसकिने भएकाले वीरगञ्जको चिनी कारखाना, कृषि औजार कारखानाजस्ता बन्द भएका उद्योगलाई पुनः सञ्चालन गर्न सरकारलाई अपिल गरे ।