कैलाली । सुदूरपश्चिम प्रदेशका भूमि व्यवस्था, कृषि तथा सहकारी मन्त्री टीका थापाले पुनःस्थापना गर्न बाँकी मुक्त कमैयाका सवालमा प्रदेश सरकार गम्भीर रहेको बताएकी छन् ।
शुक्रबार कैलालीको लम्कीमा मुक्त कमैया समाजको तेस्रो राष्ट्रिय सम्मेलनको उद्घाटन गर्दै मन्त्री थापाले प्रदेश सरकारले केही समयअघि मुक्त कमैया, कमलरी, हलियाको व्यवस्थापनका लागि कार्यविधि पारित गरिसकेको भन्दै त्यसको कार्यान्वयनका लागि आफूले पहल गर्ने बताइन् ।
‘मुक्त कमैयाका महिला र बालबालिकाको अवस्था मैले नजिकबाट देखेकी छु, उहाँहरूका समस्या बुझेकी छु । त्यसैले ती समस्या समाधानका लागि लागि म पहल गर्नेछु,’ उनले भनिन् ।
संविधानसभा सदस्य सुक्दैया चौधरीले कमैयाहरूको व्यवस्थापनमा ध्यान दिन सुदूरपश्चिम प्रदेश सरकारले मुक्त कमैया, कमलरी र हलियाको व्यवस्थापनका लागि कार्यविधि ल्याएकोमा धन्यवाद दिँदै अन्य प्रदेशले पनि यससम्बन्धी कार्यविधि ल्याउन ध्यानाकर्षण गराए ।
मुक्त कमैया समाजका अध्यक्ष पशुपति चौधरीले अधिकांश मुक्त कमैयाको नाममा जग्गा नापी भएको तर मालपोतमा लालपुर्जाको अभिलेख नभएको, छुट कमैयाको तथ्यांक संकलनको काम अगाडि नबढेका भन्दै सोसम्बन्धी आवश्यक कार्यका लागि आग्रह गरे ।
कार्यक्रममा अधिवक्ता बालाराम भट्टराईले कमैयाहरूको जीविकोपार्जनका लागि आयआर्जन, रोजगारी र पुनःस्थापनाका काम अगाडि बढाउन तीनै तहका सरकार गम्भीर हुनुपर्ने बताए ।
शुक्रबारदेखि लम्कीचुहा नगरपालिका–१ लम्कीस्थित मुक्त कमैया एकता शिविरमा सुरु भएको सम्मेलन शनिबारसम्म चल्नेछ ।