काठमाडौं । नेकपा एकीकृत समाजवादीले दलको आगामी दशौं महाधिवेशनका लागि विभिन्न देशका कम्युनिस्ट–सोसलिस्ट–लेबर पार्टी लगायत गरी करीब ६०० पार्टी निकट दल र संगठनलाई जानकारी गराएको छ ।
पार्टी विदेश विभागको शनिबार बजेको नवौं बैठकमा बंगलादेश, इरान, कजाकस्तान रुस, फ्रान्स, रोमानिया, अस्ट्रेलिया गरी २२ देशबाट प्रारम्भिक प्रतिक्रिया प्राप्त भइसकेको विवरण दिइएको छ ।
दलका सम्मानित नेता तथा विभाग प्रमुख झलनाथ खनालका अध्यक्षतामा शनिबार दलको कार्यालय आलोकनगरमा बसेको बैठकमा महाधिवेशनमा विदेशका साम्यवादी दल, वामपन्थी दल तथा प्रगतिशील संगठनहरूलाई निमन्त्रणा गरिनेबारे पनि छलफल भएको जनाइएको छ ।
महाधिवेशनमा प्रस्तुत गरिने राजनीतिक प्रतिवेदनमा विश्व परिस्थितिको समग्र विश्लेषण, नेपालको परराष्ट्र नीति र त्यसमा जलवायु परिवर्तन तथा वातावरण सुरक्षाका विषय जस्ता नयाँ आयाम पनि समावेश गरिनेबारे छलफल भएको विभागका सचिव डा. शंकर खतिवडाले जानकारी दिए ।
बैठकमा पूर्व प्रधानमन्त्री खनालले महाधिवेशनमा समाजवादी क्रान्ति र पूर्ण रूपान्तरणको कार्यक्रमसहित ४ दस्तावेज आउने र सकेसम्म केन्द्रीय समितिको एकै प्रतिवेदन बन्ने बताए ।
विभागका उपप्रमुख प्रमेश हमालले माक्र्सवादी–लेनिनवादी सिद्धान्तअनुरूप समाजवादी क्रान्ति र रूपान्तरणका दिशामा अगाडि बढ्ने पार्टीको कार्यक्रम रहेको स्पष्ट गरे । उपमहासचिव डा. विजयकुमार पौडेलले रुसी सेनामा भर्ना भएका नेपालीलाई फिर्ता गराउने, मृत्यु भएका परिवारलाई क्षतिपूर्ति दिने लगायत माग राखी पीडितका तर्फबाट भइरहेको अनशनमा पार्टीको ध्यान पुग्नुपर्ने र छिट्टै सरकारसँग सहमति गराउन भूमिका खेल्नुपर्नेमा जोड दिए ।
दलको अधिवेशन आगामी असार १६–२० गतेसम्म नेपाल प्रज्ञा–प्रतिष्ठानमा हुनेछ । पार्टी स्थायी कमिटी बैठक वैशाख २६ गते, पोलिटब्युरो बैठक वैशाख २७ र केन्द्रीय कमिटी बैठक वैशाख २८ र २९ गते बस्दैछ ।
-1727189804-1732513468.webp)
