स्याङ्जा । नेपाली कांग्रेसका केन्द्रीय उपसभापति एवं पूर्व मन्त्री धनराज गुरुङले अग्नि प्रभावित क्षेत्रको निरीक्षण गरेका छन् ।
उपसभापति गुरुङले शनिबार स्याङ्जाको चापाकोट नगरपालिका–१ का मैदान र बीरडाँडाका अग्निपीडित ५ घरपरिवारका अवस्था बुझ्नुका साथै आर्थिक सहयोग गरेका हुन् ।
आगलागीका कारण घरबारविहीन भएका जनताको घरमा पुगेर पूर्व मन्त्री गुरुङले प्रतिपरिवार १० हजार रुपैयाँका दरले आर्थिक सहयोग गरेका हुन् ।
‘घरवारविहीन हुनुभएका नागरिकको अवस्था बुझ्नका लागि घरदैलोमा आएको हुँ,’ उनले भने, ‘जनताको सुख दुःखमा जनप्रतिनिधिसँगै भएको महसूस दिलाउन अग्नि प्रभावित गाउँमा पुगेको हुँ, पहिलो चरणमा मैले पाउने मासिक पारिश्रमिकबाट सानो रकम सहयोग गरेको छु ।’
अग्नि प्रभावित मैदान र बीरडाँडाका ५ घर आगोका कारण पूर्ण रूपमा क्षति भएको थाहा पाएपछि नागरिकलाई सान्त्वना प्रदान गर्न र आगामी योजना बनाउने उद्देश्यसहित प्रभावित गाउँको स्थलगत अवलोकन गरेका छन् ।
‘आफ्ना नागरिकलाई साह्रो गाह्रो पर्दा नै हो जनप्रतिनिधिले सहयोग गर्ने हो,’ उनले भने, ‘नागरिकको वास्तविक पीडाका बारेमा उहाँहरूकै घरदैलोमा पुगेर बुझेर आएको छु, अब उहाँहरूको पुनः व्यवस्थापनका विषयमा म गम्भीर छु, अगाडि बढ्छु ।’
चापाकोट–१ मैदानका अग्निपीडित हिमबहादुर सारु मगरले घटना घटाउने मान्छेको पहिचान गरी कारबाहीको माग गरे । ‘हामीले जिताएर पठाएको जनप्रतिनिधि हजुर नै हो, म त बेघर भएँ,’ मगरले भने, ‘आगामी दिनमा म जस्तै बेघर अरु कोही पनि नहुन्, त्यसका लागि जो कोही भए पनि खोजी गरी कानूनी दायरामा ल्याउनैपर्छ ।’
आफू बस्दै आएको घर खरानी हुनुको पीडा भोग्नेलाई मात्रै थाहा हुने भन्दै उनले आगामी दिनमा यस्ता क्रियाकलाप दोहोरिन नदिनका लागि सबैले आ–आफ्नो ठाउँबाट पहल गर्नुपर्ने बताए ।
सम्पास सामुदायिक वनमा लागेको आगो फैलिँदै आउँदा वनभन्दामाथि रहेका मैदान र बीरडाँडाका ५ घर तथा गोठ जल्दा पशुचौपाया, अन्नपात, भाँडाकुँडा जलेर नष्ट भएको हो । गत सोमबार मैदानका ३ घर तथा मंगलबार बीरडाँडाका २ घरमा आगलागी हुँदा लाखौंका क्षति भएको थियो ।
मैदानमा गत सोमबार साँझ ५ बजे हिमबहादुर सारु मगर, तेजकुमारी सारु मगर र चन्द्रकुमारी सारु मगरको घर गोठ पूर्ण रुपमा जलेर नष्ट भएको थियो ।
भोलिपल्ट मंगलबार दिउँसो २ बजे घरमुनी जंगलबाट आएको आगोले बीरडाँडाका सेतीमाया सिँजाली र खमानसिंह सिँजालीको घर गोठ जलेर खरानी भएको थियो ।
-1727189804-1732513468.webp)
