तनहुँ । तनहुँका स्थानीय तहले मृत्यु भइसकेका व्यक्तिको खातामा पाँच लाख बढी रकम पठाएका छन् ।
जिल्लाका अधिकांश स्थानीय तहले मृत्यु भइसकेका व्यक्तिको खातामा सामाजिक सुरक्षा भत्ता बापतको रकम निकासा गरेका हुन् । गत आर्थिक वर्ष २०७८/७९ मा जिल्लाका विभिन्न पालिकाले पाँच लाख २५ हजार दुई सय ३३ मृत्यु भएका व्यक्तिको खातामा पठाएको महालेखा परीक्षकको प्रतिवेदनमा उल्लेख गरिएको छ ।
जसअन्तर्गत देवघाट गाउँपालिकाले २४ हजार चार सय, घिरिङ गाउँपालिकाले एक लाख ३५ हजार नौ सय ८०, भानु नगरपालिकाले ५३ हजार छ सय १०, आँबुखैरेनी गाउँपालिकाले २४ हजार चार सय, बन्दीपुर गाउँपालिकाले २४ हजार एक सय ३१, भिमाद नगरपालिकाले २९ हजार तीन सय १४, ऋषिङ गाउँपालिकाले एक लाख १६ हजार छ सय ३० र शुक्लागण्डकी नगरपालिकाले एक लाख १६ हजार सात सय ५८ मृत्युपश्चात् भुक्तानी गरेको देखिएको छ ।
सामाजिक सुरक्षा नियमावली २०७६ को नियम १३ मा सामाजिक सुरक्षा भत्ता पाउने व्यक्तिको मृत्यु भएमा उक्त लाभग्राहीलाई भत्ता पाउने सूचीबाट हटाई मृत्यु भएको दिनदेखि भत्ता दिन रोक्नुपर्ने व्यवस्था छ । तर स्थानीय तहले भने मृत्यु भइसकेका व्यक्तिलाई पनि रकम निकासा गरेको देखिएपछि त्यस्तो कार्य सुधार गर्न सुझाव दिइएको छ ।
सामाजिक सुरक्षा भत्ता वितरण कार्यविधि, २०७७ को दफा ११ (२०) मा कुनै लाभग्राहीको मृत्यु भएमा, एकल महिला लाभग्राहीले विवाद गरेमा वा ऐन, नियमावली तथा कार्यविधि बमोजिम लगत कट्टा हुनुपर्ने लाभग्राहीको हकवाला वा प्रचलित कानुन बमोजिमको सूचकले सम्बन्धित स्थानीय तहको वडा कार्यालयमा त्यस्तो घटना भएको ३५ दिनभित्र घटना दर्ता गराउनुपर्ने व्यवस्था छ ।
त्यसरी घटना दर्ता गर्दा लाभग्राही विवरण समेत अद्यावधिक गरी लगत कट्टा गर्नुपर्ने हुन्छ ।
-1732180435.webp)
