काठमाडौं । नेकपा माओवादी केन्द्रका उपाध्यक्ष एवं पूर्व सभामुख अग्निप्रसाद सापकोटाले संसद्को गरिमालाई ह्रास हुन दिन नहुने बताएका छन् ।
नेकपा माओवादी केन्द्र निकट नेपाल पर्यटन व्यवसायी संगठन बागमती प्रदेशको प्रथम भेलाको सोमबार उद्घाटन गर्दैै उनले भने, ‘संसद्भित्र विचारको रिक्तता देखिएको छ, संसद्भित्रको छलफल र बहसलाई स्तरीय बनाउनुपर्छ ।’
उनले सरकारले पर्यटन क्षेत्रको विकासका लागि खोज, अनुसन्धान र आविष्कारलाई प्राथमिकता दिनुपर्ने उल्लेख गरे । उपाध्यक्ष सापकोटाले मुलुकको विकासका लागि बृहत् वामपन्थी एकता आवश्यक रहेको बताए ।
नेकपा माओवादी केन्द्रका केन्द्रीय सदस्य एवं पर्यटन विभागका इन्चार्ज पर्यटन ऐनलाई समयअनुसार परिमार्जन गरेर अगाडि बढ्न जरुरी रहेको बताए । उनले पर्यटन क्षेत्रमा देखिएका समस्यालाई एकीकृत गरेर समाधान गर्नुपर्ने धारणा राखे ।
नेपाल पर्यटन बोर्डका उपाध्यक्ष रामप्रसाद (कमल) सापकोटाले व्यवसायी र पर्यटन क्षेत्रमा देखिएको समस्या समाधानमा नेपाल पर्यटन व्यवसायी संगठन लाग्नुपर्ने बताए । उनले पर्यटन क्षेत्रलाई सम्बोधन गर्ने खालको बजेट अहिलेको आवश्यकता रहेको उल्लेख गरे ।
पर्यटन व्यवसायी राजन सिंखडाले नेपालको समृद्धिका लागि पर्यटन क्षेत्रको विकास आवश्यक रहेको उल्लेख गरे । उनले चिनियाँ पर्यटक नेपालमा धेरै भित्र्याउनका लागि काठमाडौं–केरुङ सडकलाई स्तरोन्नति गर्नुपर्ने बताए ।
नेपाल पर्यटन व्यवसायी संगठन बाग्मती प्रदेशका उपाध्यक्ष ठाकुरप्रसाद सापकोटाले पुरानो ऐनले पर्यटन क्षेत्रको विकास हुन नसक्ने भएकाले समयअनुसार ऐन परिवर्तनका लागि लाग्न सरकारलाई आग्रह गरे । भेलाले मिलन तामाङको नेतृत्वमा ३१ सदस्यीय प्रदेश कार्यसमिति सर्वसम्मत चयन गरेको छ ।
-1732180435.webp)
