काठमाडौं । पूर्व मुख्यसचिव लिलामणि पौडेलको संयोजकत्वमा ‘गृह मन्त्रालय अन्तर्गतका निकायका सेवालाई प्रभावकारी बनाउन गठित सुझाव समिति’ले शुक्रबार उपप्रधानमन्त्री एवं गृहमन्त्री रवि लामिछाने समक्ष प्रतिवेदन पेश गरेको छ ।
मन्त्रालय अन्तर्गतका निकायका सेवालाई थप प्रभावकारी बनाउन सुझाव सहितको प्रतिवेदन तयार पार्न विक्रम संवत् २०८० कात्तिकमा गठित समितिले शुक्रबार गृहमन्त्रीलाई प्रतिवेदन बुझाएको हो ।
अध्ययन समिति तथा विषयगत उपसमितिलाई प्राप्त कार्यादेश अनुरूप विद्यमान समस्याको पहिचान गरी मन्त्रालयको कार्यसम्पादन क्षमता बढाउन तथा मन्त्रालयले प्रदान गर्ने सेवालाई थप प्रभावकारी बनाउनका लागि सुझाव दिन समिति बनाइएको थियो ।
समितिलाई शान्ति सुव्यवस्था, अपराध अनुसन्धान, संस्थागत पुनःसंरचना, कर्मचारीको कार्य क्षमता वृद्धि, कार्यसम्पादन मापन, नीतिगत तथा कानूनी सुधार, मन्त्रालय अन्तर्गतका निकायहरूको संस्थागत सुदृढीकरण, सेवा प्रवाहमा सुधार, विपद् व्यवस्थापन, राष्ट्रिय परिचयपत्र व्यवस्थापन, सीमा सुरक्षा र राजस्व चुहावट नियन्त्रण लगायतका विषयहरू समावेश गरी प्रतिवेदन पेश गर्ने कार्यादेश दिइएको थियो ।
कार्यादेश बमोजिम समितिले मन्त्रालय र मातहत निकायको कार्यसम्पादन सुधार गर्न कर्मचारीको कार्यक्षमता तथा वृत्ति विकास र संगठन तथा व्यवस्थापनका विषय समावेश गरिएको प्रतिवेदनमा तत्काल र दीर्घकालमा लागू गर्न सकिने कार्ययोजनाहरू पनि प्रस्तुत गरिएको जनाइएको छ ।
प्रतिवेदन ग्रहण गर्दै उपप्रधानमन्त्री एवं गृहमन्त्री रवि लामिछानेले कार्यदलले आफूलाई प्राप्त जिम्मेवारीभित्रका विषयमा गहन अध्ययन तथा विश्लेषण गरी प्रतिवेदन तयार गरेकोमा धन्यवाद दिएका छन् ।
उनले प्रतिवेदनका आधारमा गृह प्रशासन सुधारको मार्गचित्र तयार गरिने र सो बमोजिम सुधारका कार्यहरु अघि बढाइने बताए ।
उनले प्रतिवेदन कार्यान्वयनका क्रममा प्रतिवेदन तयारकर्ता विज्ञहरूको निरन्तर सहयोग आवश्यक हुने र मन्त्रालयलाई आवश्यक परेका बखत विज्ञहरूबाट मन्त्रालयले निरन्तर सहयोग प्राप्त गर्ने विश्वास समेत व्यक्त गरेका छन् ।
-1732265257.jpeg)
