काठमाडौं । जल तथा मौसमजन्य विपद् जोखिम सम्बन्धी पूर्व सूचना प्रवाह गर्ने सम्बन्धमा नेपाल टेलिकम र जल तथा मौसम विज्ञान विभागबीच सम्झौता भएको छ ।
नेपाल टेलिकमको केन्द्रीय कार्यालयमा शुक्रबार भएको सम्झौता पत्रमा नेपाल टेलिकमका तर्फबाट प्रबन्ध निर्देशक संगीता पहाडी (अर्याल) र जल तथा मौसम विज्ञान विभागका तर्फबाट महानिर्देशक डा. जगदीश्वर कर्माचार्यले हस्ताक्षर गरे ।
सम्झौताअनुसार जल तथा मौसम विज्ञान विभागले विपद् सम्बन्धी पूर्व सूचना मोबाइल एसएमएसमार्फत प्रवाह गर्न नेपाल टेलिकमलाई आवश्यक जानकारी उपलब्ध गराउने छ ।
बाढी वा विषम मौसमजन्य विपद् जोखिमको पूर्व सूचना तथा तत्सम्बन्धी जानकारी अनुमानित क्षेत्रमा प्रकोप आउनु अगावै सर्टकोड ११५५ मार्फत ती क्षेत्रका मोबाइल फोन बाहकले प्राप्त गर्न सक्नेछन् ।
सम्झौताअनुसार वर्षा, हावाहुरी, चट्याङ, हिमपहिरो, हिमपात/हिमआँधी, तातो हावाको लहर (लू), शीतलहर, वायु प्रदूषण, घुम्रपान, बाढी, आकस्मिक बाढी, पहिरो, हिमताल विस्फोटन, डढेलो जस्ता विपद्हरूको पूर्व सूचना उपलब्ध गराइनेछ ।
नेपाल टेलिकमले जल तथा मौसम विज्ञान विभागलाई ‘सेन्ट्रल सर्भर’मा प्रयोग गर्न पहिलेदेखि ६०० सिम उपलब्ध गराइरहेकामा अब थप १०० सिम गरी ७०० थान सिम उपलब्ध गराएको छ । सिममा प्रतिमहिना ३०० एमबी डाटा निःशुल्क उपलब्ध छ ।
नेपाल टेलिकमले विक्रम संवत् २०७३ सालदेखि यस प्रकारको सूचना प्रवाहका लागि आवश्यक सहयोग गरिरहेको छ । विभागले सम्प्रेषण गर्ने पूर्वसूचना सन्देशहरू विक्रम संवत् २०७३ सालदेखि अनवरत रूपमा निःशुल्क ‘मास एसएमएस सेवा’मार्फत सर्वसाधारणमा पुर्याई विपद् जोखिम न्यूनीकरणका लागि अतुलनीय योगदान पुर्याएकोमा नेपाल टेलिकमको भूमिकाको उच्च कदर गर्दै कदरपत्रद्वारा सम्मानित गर्दै आएको छ ।
-1732180435.webp)
