काठमाडौं । कलाका विभिन्न माध्यममार्फत स्थानीय सम्पदा, संस्कृति र सम्पदा प्रवर्द्धन गर्ने ध्येयले बागमतीको उद्गमस्थल बागद्वारसम्म पदयात्रा गरेर ‘जेसुम यात्रा’ सम्पन्न भएको छ ।
साहित्यकार, पत्रकार, चित्रकार र रंगकर्मीहरूले क्यानभासमा चित्र उतार्दै र साहित्य सिर्जना वाचन गर्दै बूढानीलकण्ठस्थित शिवपुरीको ऐतिहासिकस्थल बागद्वारमा पुगेर यात्रा समापन भएको अभियानका संस्थापक एवं बूढानीलकण्ठ नगरपालिकाकी उपप्रमुख साहित्यकार अनिता लामाले बताइन् ।
‘बागद्वार बागमती नदीको उद्गमस्थल हो । त्यही भएर यसपटक हामीले बागमती सभ्यताको उद्गमस्थललाई रोज्यौं । बागमती सभ्यता, कला संस्कृति र प्राकृतिक सौन्दर्यको अवलोकन गर्यौं । कलाकारहरूले क्यानभासमा चित्र उतार्नुभयो । साहित्यकारले सिर्जना वाचन गर्नुभयो,’ उनले भने ।
यसपटक बागद्वार जेसुम यात्रा उपप्रमुख एवं कवि लामासँगै नाराद बज्राचार्य, फूलकुमार बम्जन, स्नेह सायमी, बालकृष्ण बस्नेत, फूलमान वल, जयन्ता पोखरेल लगायतले कविता सिर्जना गरी वाचन गरेका थिए । कलाकारहरू दीपेन्द्र बनेपाली, एनबी गुरुङ, विनोद गुप्ता, चन्द्र श्रेष्ठ, विपना महर्जन, नेमबहादुर तामाङ, मनरा प्रजापति, लुनिभा महर्जन लगायतका प्रत्यक्ष रूपमा चित्र कोरेका थिए ।
सरोज अर्याल, केदार श्रेष्ठ, अनामिका गौतम, समापिका गौतम लगायतका रंगकर्मीले जीवन र प्रकृतिसँगको सम्बन्ध जोडिएको शीर्षकमा ‘ठेगाना’ नामक छोटो नाट्य प्रस्तुति गरेका उपप्रमुख लामाले बताइन् ।
बूढानीलकण्ठ नगरपालिकाको व्यवस्थापकीय सहकार्यमा सम्पन्न भएको जेसुम यात्रामा बूढानीलकण्ठ नगरपालिकाका प्रमुख मीठाराम अधिकारी, बागमती प्रदेशका पूर्व सांसद एवं नेकपा एमाले काठमाडौंका जिल्ला अध्यक्ष दीपक निरौला, प्रेस काउन्सिलका अध्यक्ष बालकृष्ण बस्नेत लगायतका अतिथिहरू पनि सहभागी रहेका उपप्रमुख लामाले बताइन् ।
स्थानीय संस्कृति र सम्पदा प्रवद्र्धन गर्न, विश्वव्यापी प्रकोप बन्दै गइरहेको जलवायु परिवर्तनप्रतिको सचेतना जगाउनका लागि यो यात्रा निरन्तर सञ्चालन भइरहेको छ । काभ्रेको धुलिखेलबाट सुरु भएको जेसुम यात्रा नगरकोट, भक्तपुर, बौद्ध, तारकेश्वर, विष्णुद्वार, धनकुटा लगायत विभिन्न थलोमा सम्पदास्थल पुगेर प्रत्यक्ष साहित्य रचना, चित्रकला सिर्जना र नाट्य प्रस्तुति गरिसकेको उपप्रमुख लामाले बताइन् ।
