काठमाडौं । काठमाडौं महानगरपालिकाले महानगरका सबै घरमा पुगेर ५ वर्षमुनिका बालबालिकालाई पोलियो थोपा खुवाउने अभियान सुरू गर्ने भएको छ ।
हालै ढलमा पोलियो भाइरस भेटिएपछि महानगरपालिकाले साउन ९ गतेबाट विशेष पोलियो खोप अभियान सुरू गर्ने भएको हो ।
यसअघि नियमित खोप लिएका बालबालिकालाई पनि खोप अनिवार्य उपलब्ध गराउन महानगरले जनाएको छ ।
महानगरका जनस्वास्थ्य निरीक्षक धनेन्द्र श्रेष्ठका अनुसार महिला स्वास्थ्य स्वयंसेविका र स्वास्थ्यकर्मी सहितको टोलीले घरघरमा गएर पोलियो थोपा खुवाउने छ । पोलियो खोप ६, १० र १४ हप्ता गरी ३ पटक मुखबाट (ओरल पोलियो भ्याक्सिन) खुवाइन्छ । १४ हप्ता र ९ महिनाको उमेरमा सुइँबाट पोलियो खोप दिइन्छ ।
राष्ट्रिय जनगणना २०७८ अनुसार काठमाडौं महानगरपालिकाभित्र २ लाख ३८ हजार ९६६ घर छन् । यी घरहरूमा ५ वर्षमुनिका करीब ६३ हजार ५६ जना बालबालिका रहेको महानगरको अनुमान छ ।
विभागको तथ्यांकमा वडागत रूपमा हेर्दा सबैभन्दा धेरै वडा नम्बर ६ मा ६ हजार १२ जना बालबालिका छन् भने सबैभन्दा कम वडा नम्बर १ मा ४६२ जना छन् ।
जनस्वास्थ्य निरीक्षक श्रेष्ठले नेपालमा सन् २०१० पछि व्यक्तिमा पोलियोको भाइरस नदेखिए पनि उपत्यकाका केही स्थानका ढलमा पोलियो भाइरस देखिए पनि खोप लगाउन थालिएको बताए । श्रेष्ठ भन्छन्, ‘पोलियो उन्मूलन रणनीति अनुरूप सन् २०१७ देखि वातावरणीय निगरानी भइरहेको थियो । उपत्यकाका विभिन्न ५ ठाउँको ढलबाट महिनाको २ पटक नमूना लिएर पोलियोको भाइरस भए नभएको हेर्ने गरिन्थ्यो । यही क्रममा सन् २०२४ (२०८१ जेठ १३ गते) काठमाडौंको टुकुचा र बागमती दोभानमा बागमती नदीतर्फको खण्डबाट (ढलबाट आएको पानी) मा लिइएको नमूनामा डिप्राइभ्ड पोलियोको भाइरस–३ भेटियो । यसको रिपोर्ट २०८१ असार २९ गते आएको थियो । प्रयोगशाला परीक्षणमा यो भाइरस मुखबाट दिइने पोलियो भाइरसको उत्परिवर्तन भएको पत्ता लागेको हो ।’
तर सोही ठाउँमा जेठ २२ गते फेरि लिइएको नमूनामा भने भाइरस नदेखिएकाले यसबारे अध्ययन भइरहेको उनले जानकारी दिए । पोलियो मुक्त देश घोषणा भएको २० वर्षपछि वातावरणमा पोलियो भाइरस देखिनुले चिन्ता उब्जाएको श्रेष्ठको भनाइ छ ।
वातावरणीय निगरानीका लागि काठमाडौं उपत्यकाबाहिर विराटनगर, जनकपुर र पोखराका १/१ ठाउँबाट महिनाको १ पटक नमूना लिने गरिएको छ । नेपालमा पोलियो उन्मूलन रणनीति २०२२–२०२६ का कार्यक्रम सञ्चालन भइरहेका छन् । सन् २०१० बाट व्यक्तिमा पोलियो नदेखिएपछि सन् २०१४ मा पोलियो मुक्त देश घोषणा गरिएको थियो ।
