काठमाडौं, ११ साउन । सञ्चार तथा सूचना प्रविधिमन्त्री पृथ्वी सुब्बा गुरुङले मुलुकमा सुशासन कायम गर्न वर्तमान सरकार बनेकाले सोअनुसार काम हुने बताएका छन् ।
नेपाल आदिवासी जनजाति पत्रकार महासङ्घ (फोनिज) संघीय समितिका पदाधिकारी तथा सदस्यहरुसँगको भेटमा आज उनले सो कुरा बताएका हुन् ।
मन्त्री गुरुङले राज्यको निकायमा सबै वर्ग र समुदायको सही प्रतिनिधित्वले मात्र सुशासन कायम हुने बताए । सरकारले आफ्नो सुरुवाती दिनदेखि सो क्षेत्रमा केन्द्रित भएर काम गरिरहेको उनको भनाइ छ ।
नेपाली सञ्चार क्षेत्रको समस्या र समाधान गर्नुपर्ने विषयबारे आफू अध्ययन गरिरहेको बताउँदै मन्त्री गुरुङले भने, “समस्या नपार्नेगरी सन्तुलित ढङ्गले काम गर्ने प्रयास गर्नेछु, सञ्चार क्षेत्रको समस्या नीतिगत रुपले समाधान गर्ने कोसिस गर्छु ।”
सार्वजनिक निकायहरुमा दुई जना पदाधिकारी राख्ने प्रवृत्तिले आपसी द्वन्द्व बढेर निकायहरु समस्यामा पर्नेगरेको चर्चा गर्दै उनले त्यसको निरुपणको प्रयास गरिने बताए। सरकारी सञ्चार माध्यममा त्यही समस्या आफूले देखेको बताउँदै मन्त्री गुरुङले सबै सरकारी सञ्चार माध्यमले आफूलाई अब्बल बनाउनुको विकल्प नरहेको बताए।
सो अवसरमा फोनिजका अध्यक्ष गजुरधन राईले सञ्चार क्षेत्रको व्यवस्थापन र नियमनका लागि बन्ने मिडिया नीति तथा ऐन समावेशी चरित्रको बन्नुपर्ने सुझाव दिए। मिडिया क्षेत्र समावेशी नहुँदा नेपाली सञ्चार क्षेत्र फष्टाउन नसकेको उनले बताए ।
सो अवसरमा फोनिजका वरिष्ठ उपाध्यक्ष लक्की चौधरी, उपाध्यक्ष अमरध्वज लामा, कार्यवाहक महासचिव समीर बलामी लगायतले मन्त्री गुरुङलाई नेपाली सञ्चार क्षेत्रको चुनौती र गर्नुपर्ने विषयमा सुझाव दिएका थिए । सो अवसरमा फोनिजका पदाधिकारी तथा सदस्यहरुको सहभागिता थियो ।
