गोरखा । गोरखासँग जोडिएको चीनतर्फको दुई वटा सीमा नाका खुलेका छन् । सामागाउँको रुइला नाका र छेकम्पारको ङुइला नाका छोटो समयका लागि खुला भएका चुमनुब्री गाउँपालिकाका अध्यक्ष नीमा लामाले जानकारी दिए । छेकम्पारतर्फको ङुइला नाका हिजोदेखि एक महिनाको लागि र सामागाउँतर्फको रुइला नाका आजदेखि १५ दिनका लागि खुला गरिएको जानकारीमा आएको उनको भनाइ छ ।
ङुइला नाकाबाट सबैभन्दा नजिकको तिब्बती गाउँ स्याकसम्ममात्रै जान पाउने गरि नाका खुलेको अध्यक्ष लामाले बताए । पाँच वर्ष पहिले नाका बन्द हुनुअघिसम्म चुम उपत्यकाका बासिन्दा किनमेलका लागि तिब्बती बजार झोंगासम्मै पुग्ने गरेका थिए ।
झोंगा अलि ठूलो बजार भएकाले सस्तोमा सामान पाउने गरेकोमा आवतजावत स्याक गाउँसम्म मात्रै सीमित हुँदा दैनिक उपभोग्य सामान केही महंगोमा किन्नुपर्ने बाध्यता हुने अध्यक्ष लामाले बताए ।
एक महिनाका लागि नाका खुलेको जानकारी आएपछि चुम उपत्यकाका बासिन्दा किनमेलका लागि सीमा पारि जाने तयारीमा जुटेका चुमनुब्री गाउँपालिका वडा नम्बर–७ का अध्यक्ष टासी दोर्जे लामाले बताए । सामान ढुवानीका लागि घोडा मात्रै लिएर जान पाउने गरि नाका खुलेको उनको भनाइ छ ।
यस्तै सामा गाउँतर्फको रुइला नाका १५ दिनका लागि खुला गरिएको जानकारी चिनियाँ पक्षबाट आएको सशस्त्र प्रहरी बलको गोरखा गुल्मका डीएसपी केशवराज ओलियाले जानकारी दिए । तिब्बतका स्थानीय जनप्र्रतिनिधिले सशस्त्र प्रहरी बलको साम्दोगाउँमा रहेको सीमा सुरक्षा बललाई सम्पर्क गरि नाका खुलेको जानकारी गराएका उनको भनाइ छ ।
सशस्त्र प्रहरी बलले केही महिनाअघि मात्रै चुमनुब्री गाउँपालिका वडा नम्वर–१ को साम्दोमा बोर्डर आउट पोष्ट (बिओपी) स्थापना गरेको छ ।
नाका खुल्ने भए पछि बिओपीबाट सुरक्षाकर्मीलाई ३५ नम्वर पिल्लर रुइला नाकामा पठाउन लागिएको ओलियाले जानकारी दिए । तर रुइला नाकाबाट पनि तिब्बती बजारको सीमित क्षेत्रमा मात्रै प्रवेश दिइने चिनियाँ पक्षले बताएको चुमनुब्री गाउँपालिकाका अध्यक्ष नीमा लामाले बताए ।
कोरोना संक्रमण शुरु हुनुअघिसम्म नुब्री उपत्यका अन्तर्गत पर्ने ल्हो, प्रोक, बिही र सामागाउँका बासिन्दा किनमेलका लागि तिब्बतको कोङदाङ बजारसम्म पुग्ने गरेका थिए । यो पटक भने रुइला नाकाबाट नजिकै रहेको रुई गाउँसम्म मात्रै जान पाउने गरि नाका खुला भएको अध्यक्ष लामाको भनाइ छ ।
छोटो समयका लागि दुवै नाका खुला भएपछि चुमनुब्री गाउँपालिकाका बासिन्दालाई उपभोग्य सामग्री किनमेलका लागि सहज हुने भएको छ । गोरखाकै तल्लो क्षेत्रको बजारबाट सामान किनेर लैजाँदा ढुवानी मूल्यका कारण महंगो पर्ने गरेकोमा अब चिनियाँ बजारबाट तुलनात्मक रुपमा सस्तो र सहज रुपमा सामान ल्याउन पाइने भएपछि स्थानीय बासिन्दा खुशी भएका छन् ।
