काठमाडौं । नेकपा एमालेले पार्टी सङ्गठन सुदृढ अभियान अन्तर्गत पार्टीका स्थायी संरचनाहरूलाई चलायमान बनाउने भएको छ । आगामी एक वर्षमा गर्न सक्ने कामसहितको योजना बनाएर सोही अनुसार कार्यान्वयनमा लैजाने एमालेको तयारी छ ।
बिहीबार बस्ने केन्द्रीय सचिवालय बैठकमा प्रस्तावित वार्षिक कार्ययोजनामाथि छलफल गरेर पारित गर्दै कार्यान्वयनमा लैजाने एमाले प्रचार विभाग प्रमुख राजेन्द्र गौतमले जानकारी दिए ।
यसअघि अभियानका रूपमा कार्यक्रम बनाएको एमालेले यो पटक भने पार्टी संरचनालाई चलायमान बनाउन नियमित कार्यक्रमअन्तर्गत कार्ययोजना बनाउन लागेको हो ।
नेता गौतमका अनुसार सचिवालय बैठकमा पार्टीको वार्षिक कार्ययोजना र समसामयिक राजनीतिक प्रस्तावसम्बन्धी छलफल गर्ने कार्यसूची तय भएको छ ।
‘पार्टीको एक वर्षे सङ्गठन सुदृढीकरण कार्ययोजना, समसामयिक राजनीतिक परिस्थिति, सरकारको एक महिना, सडकको अराजकतालगायत छन्’, गौतमको भनाइ छ । एमालेले पार्टीको वार्षिक कार्ययोजना अन्तर्गत सङ्गठन र पार्टी सदस्यता विस्तारलाई प्राथमिकतामा राखेको छ । त्यस्तै पार्टीभित्र शुद्धीकरण सुदृढीकरण अभियान सञ्चालन गर्ने एमालेको तयारी छ । त्यसका अलावा जिल्ला जिल्लामा पार्टी प्रवेश कार्यक्रम र प्रशिक्षणजस्ता कार्यक्रम सचिवालयमा प्रस्ताव गर्नेछ ।
प्रस्तावित कार्यक्रम सचिवालयबाटै पारित गरेर कार्यान्वयनमा लैजाने वा अन्य कमिटीमार्फत अघि बढाउने भन्ने सचिवालयले नै निर्णय गर्नेछ ।
एमाले उपमहासचिव प्रदीप ज्ञवालीले विशेषगरी एक वर्षे कार्ययोजना अन्तर्गत सदस्यता विस्तार र जन सरोकारका विषयसहित जनपरिचालनलाई केन्द्रमा राखेर कार्यक्रम बन्ने बताए । उनले सङ्गठनात्मक, वैचारिक, जनपरिचालन, कार्यविभाजन र कार्यालय व्यवस्थापन, जनतासँगको सम्बन्ध लगायतमा कार्ययोजना बनाएर पार्टीलाई अघि बढाउन लागिएको बताए ।
‘जनतासँग प्रत्यक्ष पुग्ने विषय र पार्टी स्कुलिङका विषयलाई प्रभावकारी बनाउने कार्ययोजना रहेका छन्’, ज्ञवालीले रातोपाटीसँग भने, ‘केन्द्रसहित प्रदेश कमिटीहरूलाई चलायमान बनाउने योजना बन्छन् ।’
त्यसको अलावा एमालेले पार्टी जनसंगठनहरुलाई थप व्यवस्थित बनाउने तयारी गरेको छ । ‘हाम्रो पार्टी स्थापनाको ७५ औँ वर्षका केही कामहरू बाँकी रहेका थिए । तिनलाई पनि पुरा गर्ने योजना छ’, ज्ञवालीले भने, ‘पालिका र वडा अधिवेशनहरू भइरहेका छन् । तिनलाई निरन्तरता दिनेगरी कार्ययोजना बन्छन् ।
सरकारको समीक्षा हुने
नेकपा एमालेले अध्यक्ष केपी शर्मा ओली नेतृत्वको सरकारको एक महिने कार्यकालको समेत विश्लेषण गर्ने भएको छ । ओलीको नेतृत्वमा गत असार ३० गते कांग्रेससहितको सरकार बनेको थियो ।
‘सचिवालय बैठकमा सरकारको एक महिने कामको समीक्षा पनि हुन्छ । सरकारले कस्ता कार्यक्रमलाई प्राथमिकतामा राखेको छ ? कस्ता कार्यक्रम ल्याउँदैछ भन्नेबारे छलफल हुन्छ’, सचिवालयका एक नेताको भनाइ छ ।
दुई ठुला दल मिलेर बनेको गठबन्धन र त्यस गठबन्धनका आधारमा गठन भएको सरकारले स्थिरता कायम गर्दै सुशासन कायम गर्ने विषयलाई प्राथमिकतामा राखेको बताउँदै आएको छ । तर सरकारको भनाइ र गराइमा एकरुपता आउन नसकेको प्रतिपक्ष दलले आरोप लगाउँदै आएका छन् ।
