काठमाडौं । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले नेकपा एमालेसँगको गठबन्धन रहर नभई बाध्यता भएको बताएका छन् ।
शनिबार सूर्यप्रसाद उपाध्यायको चालिसौं स्मृति दिवसका अवसरमा ‘नेपाली कांग्रेसका प्रमुख संस्थापकको वास्तविक पहिचान र यथोचित सम्मान’ विषयक विचार गोष्ठी कार्यक्रममा उनले राजनीतिक अस्थिरताबाट मुलुकलाई मुक्त गर्नका लागि ८४ सम्म एमालेसँगको गठबन्धनलाई लिएर जाने बताए ।
‘अहिले कम्युनिष्टसँगको मेलमिलाप र सहकार्यको नीति रहर होइन, बाध्यता हो । हामी होशियार हुनुपर्ने कुरा भनेको हाम्रो मौलिकता जोगाउने विषयमा हो । राजनीतिक स्थिरता जरुरी भयो, माओवादी अध्यक्षले जुन राजनीतिक अस्थिरताको भूमिका निर्वाह गर्नुभयो, त्यसबाट मुलुकलाई मुक्त गर्नका लागि ८४ सम्म एमालेसँगको गठबन्धनलाई लिएर जान्छौं । ८४ मा पुगेपछि हाम्रो मूल प्रतिस्पर्धी एमाले नै हो,’ उनले भने ।
उनले इतिहासका कुनै पनि कालखण्डमा सूर्यप्रसाद उपाध्याय नछुटेको भन्दै अन्य नेताहरू सरह सम्मान पाउनुपर्ने बताए । उनले भने, ‘के कारणले इतिहासको कुन त्यस्तो कालखण्ड, मोड र घटना हो, जहाँबाट सूर्यप्रसाद उपाध्याय छुट्नुभयो, अरु नेताहरू शिरमा राख्न मिल्ने गरी रहनुभयो भन्ने कुरा पनि एउटा गम्भीर समीक्षा हो ।’
सूर्यप्रसाद उपाध्याय दानी र नेतृत्व गर्न सक्ने क्षमता भएको व्यक्ति भएको भन्दै नेपालको राजनीतिमा उनलाई एउटा ज्ञानी व्यक्तित्वको रूपमा चिन्ने गरेको पनि उनले बताए ।
