काठमाडौ । संघीय संसदको शिक्षा, स्वास्थ्य तथा सूचना प्रविधि समितिले लुम्बिनी बौद्ध विश्वविद्यालयको अध्ययन गरेको छ । संसदीय समितिका १० जनाको टोलीले विश्वविद्यालयको विभिन्न निकायहरूको अध्ययन गरेको हो ।
२०८१ असोज १ गते देवदहस्थित डिन कार्यालय तथा देवदह शिक्षा विकास परियोजना र बुटवल नयाँगाउँस्थित सिटी क्याम्पसको स्थलगत अध्ययन गरेको हो ।
सो अवसरमा देवदहमा आयोजना गरिएको परियोजना परिचयात्मक कार्यक्रममा बोल्दै संसदीय समितिका सभापति अम्मरबहादुर थापाले शिक्षा विकास परियोजना निकै महत्त्वपूर्ण रहेकाले यसको कार्यान्वयनमा सघाउने प्रतिबद्धता जनाए ।
उनले लुम्बिनी बौद्ध विश्वविद्यालय स्थानीय स्तरदेखि अन्तर्राष्ट्रिय पहिचान बनाउन सक्ने क्षमताको रहेको भन्दै प्रवर्द्धनमा सरकारले नै काम गर्नुपर्ने बताए ।
देशमा रहेका विश्वविद्यालयमध्ये अन्तर्राष्ट्रिय क्षेत्रमा फैलिने क्षमता लुम्बिनी बौद्ध विश्वविद्यालयसँग रहेको भन्दै उनले आफूहरूले समितिमा छलफल गरेर यसको विकासमा ठोस निर्देशन सरकारलाई गर्ने जनाए ।
विश्वविद्यालयहरू पठनपाठनमा केन्द्रित नभएर अनुसन्धानमा केन्द्रित हुनुपर्ने सुझाव उनको थियो । विश्वविद्यालयले अनुसन्धान गरेर सो अनुसन्धान कार्यान्वयनका लागि सरकारलाई प्रतिवेदन दिनुपर्ने उनले बताए ।
समितिका सदस्य छविलाल विश्वकर्माले देवदहमा विश्वविद्यालयका लागि निकै प्रयासका बाबजुद जग्गा प्राप्त भएको भन्दै त्यसको बहुउपयोग गर्नुपर्ने बताए । स्थानीय उपभोक्ताका आवश्यकता जोड्दै विश्वविद्यालय अगाडि बढिरहेको भन्दै उनले देवदहको परियोजनालाई सफल बनाउने जिम्मेवारी सबैले लिनुपर्ने धारणा राखेका थिए ।
अर्का सदस्य देवेन्द्र पौडेलले विश्वविद्यालय अन्तर्राष्ट्यि पहिचान बनाउन सक्ने भन्दै त्यसका लागि सरकारले विशेष जोड दिनुपर्ने सुझाए । देशका प्रधानमन्त्रीहरू अन्तर्राष्ट्रिय फोरमहरूमा जाँदा लुम्बिनी बौद्ध विश्वविद्यालयको नाम र काम उच्चारण गरेर प्रवर्द्धन गर्नुपर्ने उनको भनाइ थियो ।
बौद्ध दर्शन र शिक्षा अध्ययन गर्न बौद्ध राष्ट्मात्रै नभई विश्व समुदाय नै लुम्बिनी आउन लालायित भएको भन्दै त्यसलाई उपयोग गर्ने दायित्व सरकार र विश्वविद्यालयको रहेको उनले बताए । त्यस्तै अर्का सदस्य डिगबहादुर लिम्बुले बौद्ध विश्वविद्यालयले अगाडि बढाएको परियोजना कार्यान्वयनमा समितिले सघाउने बताउँदै समुदायलाई जोडेर जान सुझाव दिए ।
कार्यक्रममा विश्वविद्यालयका उपकुलपति प्रा. डा. सुवर्णलाल बज्राचार्यले विश्वविद्यालयले देवदहमा शिक्षा विकास परियोजना सुरुआत गरेको जानकारी गराए । प्राज्ञिक विकासका लागि अनुमानित ८ सय करोडको गुरुयोजना तयार भएको भन्दै उनले परियोजना अन्तर्गतका पूर्वाधार निर्माणका लागि दातृ निकायको खोजी भइरहेको उनले बताए ।
चीन, थाइल्याण्ड, कोरिया, जापान, श्रीलंका, म्यानमारसहितका राष्ट्हरुबाट सहयोगको प्रतिबद्धता प्राप्त भएको भन्दै उपकुलपति बज्राचार्यले बोर्ड ट्रस्टमार्फत दान संकलन गरिने बताए ।
