काठमाडौं । नागार्जुन नगरपालिकाका नगर प्रमुख मोहन बहादुर बस्नेतमाथि भ्रष्टाचार र सम्पत्ति शुद्धीकरण गरेको अभियोगमा विशेष अदालतमा आरोपपत्र दायर गरिएको छ ।
बस्नेतले नगर प्रमुखको पदको दुरुपयोग गरी पद्मा मर्चेन्ट कम्पनीका संचालक राजुप्रसाद कंडेलसँग मिलेमतो गर्दै गैरकानुनी रूपमा करोडौं रुपैयाँको सम्पत्ति आर्जन गरेको अख्तियार दुरुपयोग अनुसन्धान आयोगले जनाएको छ ।
अनुसन्धानअनुसार बस्नेतले नगरपालिकाबाट कर छुट, विदेशी सहयोग स्वीकृतिको सहजीकरण, र जग्गा खरिदमा अनियमितता गर्दै घुसस्वरूप ९ करोड २२ लाख रुपैयाँभन्दा बढी रकम लिएको पाइएको छ ।
उनले पदको दुरुपयोग गरी श्रीमती उर्मिला बस्नेतको संलग्नतामा गैरकानुनी रूपमा आर्जित सम्पत्तिको शुद्धीकरण गरेको पनि दाबी गरिएको छ । अख्तियारका अनुसार बस्नेतले उक्त सम्पत्ति बैंक खातामार्फत भुक्तानी, घर निर्माण, र अन्य खर्चमा प्रयोग गरी गैरकानुनी स्रोत लुकाउने प्रयास गरेका थिए ।
यसैगरी राजु प्रसाद कंडेलले नेतृत्व गरेको पद्मा मर्चेन्ट कम्पनीले जग्गा खरिद प्रक्रियामा अनियमितता गर्दै करिब २४ करोड ५२ लाख रुपैयाँ घाटा हुने गरी नगरपालिकाभित्रको जग्गा आफ्नो कब्जामा लिएको दाबी गरिएको छ ।
विशेष अदालतमा दायर गरिएको आरोपपत्रमा मोहन बहादुर बस्नेत, उनकी श्रीमती उर्मिला बस्नेत, र राजु प्रसाद कंडेलसहित पद्मा मर्चेन्ट कम्पनीका अन्य अधिकारीहरूमाथि भ्रष्टाचार निवारण ऐन र सम्पत्ति शुद्धीकरण ऐन अन्तर्गत कारबाहीको माग गरिएको छ ।
