सेयर बजारको पुँजीकरण एक दशकमै पाँच गुणाले बढ्यो

मंगलबार, भदौ ५, २०८० व्यवस्था संवाददाता

काठमाडौं । अर्थतन्त्रको प्रमुख हिस्साका रूपमा रहेको मुलुकको सेयर बजारको पुँजीकरण एक दशकमै पाँच गुणाले बढेको छ ।

डिजिटल प्रविधिमा आएको विकाससँगै अनलाइनबाट हातहातमा कारोबार गर्न मिल्ने भएपछि लगानीकर्ताको आकर्षणले पुँजी बजारमा छोटो समयमै उछाल आएको हो ।

आर्थिक वर्ष २०६९/७० मा ५ खर्ब १४ अर्ब रूपैयाँको सेयर बजार पुँजीकरण आव २०७९/८० मा आइपुग्दा ३० खर्ब ८२ अर्ब रूपैयाँमा पुगेको छ । यसरी हेर्दा नेपालमा सबैभन्दा द्रुत गतिमा विकास हुने क्षेत्रमध्ये पुँजी बजार पनि देखिएको छ ।

प्रविधिको विकास, पुँजी बजारमा नयाँ कम्पनीहरू लिस्टेट हुने क्रमको वृद्धि, ठुलो पुँजी भएका कम्पनीहरू सेयर बजारमा आएकाले पुँजीकरणको आकार बढेको हो । कोभिड–१९ को महामारीसँगै अनलाइन कारोबारले अझ व्यापकता पाएपछि सेयर बजारमा आकर्षण ह्वात्तै बढेको थियो ।

आव २०७७/७८ मा सेयर पुँजीकरण औसत ४० खर्ब १० अर्बरूपैयाँ पुगेको थियो । कोभिडको समयमा अन्य कारोबार नभएकाले सबै लगानीकर्ता सेयर बजारमा केन्द्रित भएका थिए । पछिल्ला दुई वर्षमा लगानीकर्ताले भने करिब १० खर्ब रूपैयाँ गुमाएपछि सेयर पुँजीकरण ३० खर्ब ८२ अर्ब रुपैयाँमा खुम्चिएको छ ।

१० वर्षमा नेप्से सूचकांक पनि चार गुणाले बढेको छ । आव २०६९/७० मा ५१३.३३ रहेको नेप्से आव २०७९/८० को अन्त्यमा आइपुग्दा औसत सूचकांक १,९५३.०६ अंकमा पुगेको थियो । एक वर्षमा नेप्से सूचकमा भने सामान्य वृद्धि भएको छ । धितोपत्र बजार मापन परिसूचक नेप्से सूचक समग्रमा ८७.६ प्रतिशत मात्र बढेको छ ।

यो नागरिक दैनिकमा आज प्रकासित समाचार हो ।

प्रकाशित मिति: मंगलबार, भदौ ५, २०८० ०६:५१