काठमाडौं । हेटौँडा उपमहानरगपालिकाले आगामी आर्थिक वर्ष २०८०/८१ का लागि नीति तथा कार्यक्रम कार्यान्वयनका लागि रु दुई अर्ब ६० करोड ६५ लाख ४० हजार आठ सय अनुमानित बजेट विनियोजन गरेको छ ।
शनिबार आयोजित १३ औँ नगर सभाबाट उपप्रमुख राजेश बानियाँले नीति तथा कार्यक्रम र बजेट प्रस्तुत गरेका हुन् ।
उनले आगामी आर्थिक वर्षका लागि खर्च ब्यहोर्ने स्रोतमध्ये आन्तरिक स्रोतबाट रु ८३ करोड ६६ लाख ६२ हजार, राजस्व बाँडफाँटबाट रु ५९ करोड १४ लाख १० हजार, प्रदेश सरकारको विभिन्न शीर्षकअन्तर्गत अनुदानबाट रु तीन करोड ३४ लाख ६८ हजार, संघीय सरकारको अनुदानबाट रु एक अर्ब १४ करोड ५० लाखबाट बेहोरिने जानकारी दिए ।
उपप्रमुख बानियाँले क्षेत्रगत रूपमा नगरभित्रका विकासका लागि बजेट प्रस्तुत गरेका थिए ।
उपप्रमुख बानियाँले सभामा नगरको प्रगति समीक्षा गर्दै चालु आवमा रु तीन अर्ब ३३ करोड १३ लाख ४५ हजार संशोधित स्वीकृत अनुमान गरेकामा हालसम्म रु एक अर्ब ७० करोड ७२ लाख ३८ हजार ९८८ राजस्व तथा अनुदान संकलन भएको जानकारी दिए ।
उनका अनुसार बजेट तथा खर्चको विवरणअन्तर्गत चालुतर्फ रु एक अर्ब ५६ करोड ५८ लाख ५७ हजार विनियोजन भएकामा रु एक अर्ब सात करोड ६६ लाख ७० हजार खर्च भएको छ ।
उपप्रमुख बानियाँले पूँजीगततर्फ कूल रु एक अर्ब ६५ करोड ३९ लाख ८७ हजार बजेट विनियोजन भएकामा हालसम्म रु ७० करोड ७९ लाख १३ हजार खर्च भएको बताए ।
वित्तीय व्यवस्थातर्फ रु एक करोड १५ लाख विनियोजन भएकामा रु ८५ लाख ६५ हजार खर्च भएको उनले जानकारी दिए ।
