मुग्लिन । चितवनको पहाडी भूगोलमा पर्ने इच्छाकामाना गाउँपालिकामा थुप्रै पर्यकटीय स्थल पर्छन् । प्रचारप्रसार र भौगोलिक विकटताको अभावका कारण पर्यटकीय स्थल ओझेलमा पर्दै आएका छन् ।
पछिल्लोे समय फिस्लिङ शक्तिखोर सडक स्तरोन्नति भएसँगै इच्छाकामनाको माथिल्लो भेगमा पर्यटन व्यवसाय बढ्न थालेको छ । स्थानीयका अनुसार वडा नं २ मायाटार गाउँ पर्यटकीय गन्तव्यका रूपमा विकसित हुँदै गएको छ ।
गुरुङ र चेपाङ जातिको बाक्लो बसोबास छ फिस्लिङ(शक्तिखोर सडकको मध्य भागमा पर्ने मायाटार गाउँमा ।घरबास होमस्टे० सञ्चालकसमेत रहेका स्थानीय टीका गुरुङका अनुसार गर्मी मौसममा आन्तरिक पर्यटक बढी पुग्ने गरेका छन् । ’जिल्लाको तराई भेग र इच्छकामनाको तल्लो भेगमा गर्मी हुँदा मायाटारमा भने सिरक ओढेर सुत्नुपर्ने अवस्था हुन्छ,’ उनले भने, ’गर्मी छल्न अन्य मौसममा भन्दा बढी आन्तरिक पर्यटक यहाँ पुग्ने गर्छन् ।’ यहाँ दैनिक आन्तरिक पर्यटक आएर बास बस्ने गरेका छन् ।
गाउँपालिका अध्यक्ष दानबहादुर गुरुङले पर्यटकको आवागमनसँगै यो गाउँलाई होमस्टेका रूपमा विकास गर्ने योजना रहेको बताए । विशेष गरेर मायाटारसहित नजिक रहेका गुरुङ बस्ती, घुर्केस र डाँडागाउँमा होमस्टे सञ्चालन गर्ने तयारी भइरहेको छ ।
’यहाँ आउने पर्यटकलाई गुरुङ र चेपाङ समुदायको सांस्कृतिक झाँकीबाट मनोरञ्जन प्रदान गर्नका लागि होमस्टे सञ्चालन गर्ने योजना बनाएका छौँ । मायाटार नजिकै घुर्केस, डाँडागाउँलगायत रमणीय गुरुङ बस्ती छन्,’ अध्यक्ष गुरुङले भने, ’गुरुङ र चेपाङ समुदायको कला संस्कृतिबाट यहाँ आउने पर्यटकलाई थप मनोरञ्जन प्रदान गर्न सकिन्छ ।’
होमस्टे सञ्चालनका लागि स्थानीयलाई तालिमका साथै आर्थिक सहयोग गर्ने गाउँपालिकाको योजना रहेको उनले बताए । होमस्टे सञ्चालनमार्फत स्थानीयको आयस्तरमा समेत वृद्धि हुने उनको भनाइ थियो ।
मायाटारमा रहेको बालगौरी पाथीभरा सिंहदेवीमाईको मन्दिरमा दर्शन गर्न आउने दर्शनार्थी पनि बढेका छन् । स्थानीयका अनुसार यो मन्दिरमा सन्तान नहुनेले सन्तान प्राप्तिका लागि भाकल गरेर पूजा गर्ने चलन रहेको छ । यस मन्दिरमा स्थानीय मात्र नभई छिमेकी जिल्ला गोरखा, धादिङ, तनहुँसहित काठमाडौँ र भक्तपुरबाट समेत पूजा गर्न आउने गरेका छन् ।
गाउँपालिकाले बाटो निर्माणसँगै अन्य भौतिक संरचना बनाउन आर्थिक सहयोग गर्दै आएको अध्यक्ष गुरुङले बताए । उनका अनुसार करिब दुई सय मिटरको दूरीमा फलामको रेलिङसहितको सिँढी बाटो निर्माण भएको छ । मन्दिर आसपासको क्षेत्रलाई गेटसहित तारजाली लगाएर थप व्यवस्थित र संरक्षण गरिएको गाउँपालिका अध्यक्ष गुरुङले बताए ।
अध्यक्ष गुरुङका अनुसार हाल मन्दिरमा तीन जना पुजारीबाट पूजा हुन्छ । मनकामना केबलकार जलविरे झरना, इच्छाकामना मन्दिर, उपरदाङगढीजस्तै इच्छाकामना गाउँपालिकाका लागि यो मन्दिर पनि एउटा धार्मिक पर्यटकीय गन्तव्य बन्न सक्छ ।