काठमाडौं । ६० किलो सुन प्रकरणको अनुसन्धान अन्तिम चरणमा पुगेको छ । केन्द्रीय अनुसन्धान ब्युरो (सीआईबी) ले अनुसन्धान सकेर सरकारी वकिल कार्यालय काठमाडौंमा अनुसन्धान प्रतिवेदन बुझाउने तयारी गरेको हो ।
केन्द्रीय अनुसन्धान ब्युरोका अनुसार मंगलबार प्रतिवेदन बुझाउने गरी तयारी भइरहेको । मंगलबार सम्भव नभए बुधबार बुझाउने तयारी छ ।
सीआईबीले ६० किलो सुन तस्करी प्रकरणमा संगठित अपराधमा अनुसन्धान गरिरहेको छ । प्रहरीले यसमा इन्टरपोलको समेत सहयोग लिएको छ । जसका लागि एसएसपी दिनेश आचार्य हङकङ र डिएसपी धर्मराज भण्डारी भारत समेत पुगेका थिए ।
सुरूमा राजश्व अनुसन्धान विभागले साउन २ गते त्रिभुवन अन्तर्राष्ट्रिय विमानस्थलको भन्सार कार्यालयबाट भन्सार जाँच पास भएर छुटेपछि सुन बरामद गरेको थियो ।
हङकङको क्याथे प्यासिफिक एयरबाट ल्याइएको १५५ किलोको ब्रेक शुभित्र ६० किलो ७ सय १६ ग्राम सुन बरामद भएको हो । उक्त सुन रेडी प्रा.लि नामको कम्पनीले मगाएको थियो ।
सीआईबीले यस प्रकरणमा ३० जनालाई पक्राउ गरेको छ । एक जना भने हाजिर जमानीमा छन् ।
पक्राउ पर्नेहरूमा बेल्जियन नागरिक दावा छिरिङ, रेडी प्रा.लिका सञ्चालक दिलीप भुजेल, उनका मामा रामकुमार भुजेल, हर्कराज राई, भन्सार अधिकृत सन्तोष चन्द, भन्सार अधिकृत पुष्पा जोशी, नायब सुब्बा कमल परियार, नायब सुब्बा वीरेन्द्र नेपाली, खरिददार एवं जाँचकी कुमार ढकाल र एक्सरे अपरेटर सरोज श्रेष्ठ प्रहरी हिरासतमा छन् ।
भन्सार एजेन्ट यादवशंकर पराजुली, राजेन्द्र राई, सुदर्शन गौतम, पुष्करराज भट्ट, कृष्ण श्रेष्ठ, राजन श्रेष्ठ, ट्याक्सी चालक अशोक लामा, भारतीय नागरिक थाप्तेन छिरिङ, गणेश पौडेल, किशोर बस्नेत, सुमन खरेल, सुरेन्द्र तामाङ र बारा सुनचाँदी व्यवसायी संघका अध्यक्ष शिवकुमार सफर पनि प्रहरी हिरासतमा छन् ।
यस्तै डिंग सेग्फा, वेन टोंग, टियान मी, ली नेङकाई, याओ पुचेङ्ग, ली वेन सुङ्ग र जीक्वाङ लिन पनि पक्राउ परेका छन् ।
यसअघि पक्राउ परेकी भन्सार एजेन्ट रूक्मिनी सुब्बा हाजिर जमानीमा छिन् । उनको स्वास्थ्य अवस्थाका कारण छाडिएको हो ।
-1732265257.jpeg)
