बेइजिङ । प्रधानमन्त्री पुष्पकमल दाहाल ‘प्रचण्ड’ चिनियाँ राष्ट्रपति सी चिनफिङलाई भेटर उत्साहित भएका छन् ।
चीन भ्रमणमा रहेका प्रधानमन्त्री प्रचण्डले आज आईतबार साँझ बेइजिङस्थित नेपाली दूतावासमा आयोजित स्वागत समारोहलाई सम्बोधन गर्दै वार्ता निकै सौहार्द्रपूर्ण रहेको र यसले २ देशबीचको सम्बन्धलाई थप उचाइमा पुर्याउने विश्वास आफूले लिएको बताए ।
प्रधानमन्त्री प्रचण्डले भने, ‘यस पटकको चीन भ्रमणको यो फरक र विशिष्ट उपलब्धि भएको भएको छ र राष्ट्रलाई चीनसँगको कुराकानीबाट विश्वासको थप वातावरण सिर्जना भएको महसूस मैले गरेको छु ।’
नेपाल–चीनबीचको सदियौं पुरानो सम्बन्धलाई भ्रमणले नयाँ आयाम थपेको भन्दै उनले सीसँगको वार्ताका क्रममा नेपालको विकासका लागि सहयोगका साथै नयाँ क्षेत्रहरूमा लगानीका विषयमा समेत कुराकानी भएको बताए ।
समारोहमा प्रधानमन्त्री दाहालले नेपालको विकासका लागि सरकारको एकल प्रयास मात्र सम्भव नहुने भन्दै वर्तमान सरकारले निजी क्षेत्रसँगको सहकार्यबाट अघि बढ्ने नीति लिएको बताए ।
यसपटक आफूले संयुक्त राष्ट्रसंघीय महासभामा नयाँ तथा फरक मुद्दा उठाएको प्रधानमन्त्री प्रचण्डले बताए । उनले नेपालको शान्ति प्रक्रिया नयाँ र फरक प्रकृतिको रहेको र यससम्बन्धी संक्रमणकालीन न्यायका कतिपय काम टुंग्याउनुपर्ने कुरा आफूले अन्तरराष्ट्रिय समुदायलाई भनेको बताए ।
जलवायु परिवर्तनले नेपाललाई पुर्याएको असरका साथै अति कम विकसित राष्ट्रहरूका मुद्दा पनि आफूले एलडीसीको अध्यक्ष देशका हैसियतमा उठाएको उनले बताए ।
प्रधानमन्त्री प्रचण्डले यसपटकको भ्रमण नेपाल–चीन सम्बन्धका विविध आयामहरूलाई थप प्रगाढ बनाउने कार्यमा केन्द्रित रहेको भन्दै आगामी दिनमा सहयोग र समझदारीका क्षेत्रहरू बढ्ने तथा कृषि, पर्यटन, स्वास्थ्य, शिक्षा आदि विषयमा सहयोग आदानप्रदान थप सुदृढ हुने विश्वास व्यक्त गरे ।
यसपटक आर्थिक विकास र समृद्धितर्फ देशलाई अगाडि लैजाने वाचासहित आफू प्रधानमन्त्री भएको प्रसङ्ग उल्लेख गर्दै सोहीबमोजिम वर्तमान सरकारले काम अगाडि बढाएको र परिणाम पनि देखा परिरहेको प्रधानमन्त्री प्रचण्डको भनाइ छ ।
यसअघि प्रधानमन्त्री दाहालले नेपाल उद्योग वाणिज्य महासंघ र चिनियाँ उद्योगी व्यवसायीको संस्था सीसीपीआईटीद्वारा नेपाल–चीन बिजनेश समिटलाई सम्बोधन गर्दै नेपालमा लगानीका प्रचुर सम्भावना रहेकाले लगानी गरी लाभ लिन चिनियाँ उद्योगीलाई आग्रह गरेका थिए ।
उनले भने, ‘कुनै पनि देशको विकास सरकार आफैँले मात्र गर्न सक्दैन, देशको आर्थिक समृद्धिको ‘इन्जिन’ निजी क्षेत्र भएकाले सहयोग र सहकार्यका साथ अगाडि बढ्न चाहेको कुरा मैले बारम्बार गरेको छु, आज पनि यहाँ दोहोर्याउन चाहन्छु ।’
