भक्तपुर । पूर्व राजा ज्ञानेन्द्र शाहले पहिलोपटक भक्तपुरस्थित तलेजु र आकाश भैरवको पूजा एवं दर्शन गरेका छन् ।
भक्तपुरका स्थानीय जनताको अनुरोधलाई स्वीकार्दै आज आईतबार भक्तपुर पुगेका हुन् ।
गणतन्त्र घोषणापछि पूर्वराजा ज्ञानेन्द्रले आज आईतबार भक्तपुरको दरबारस्क्वायरमा रहेको तलेजु भवानी र तौमढीमा रहेको आकाश भैरवको दर्शन एवं पूजा गरेका हुन् । उनको स्वागतका लागि ठूलो संख्यामा स्थानीयवासी दरबार स्क्वायर परिसरमा नेपालको राष्ट्रिय झन्डा बोकेर सहभागी भएका थिए ।
स्वागतमा झाँकी, विभिन्न सांस्कृतिक नाच एवं बाजाहरू बजाइएको थियो ।
स्थानीय अनन्तप्रसाद धौभडेलको संयोजकत्वमा राष्ट्रिय प्रजातन्त्र पार्टीका प्रदेश सांसद तथा केन्द्रीय सदस्य, नेपाली सेनाका पूर्व कर्णेल, जर्नेल एवं पूर्व मन्त्री एवं केन्द्रीय नेता टंक ढकाल, राप्रपाका सहमहामन्त्री रवीन्द्रप्रताप शाह, केन्द्रीय सदस्य रामहरि थापा, जमुना थापा, कार्यक्रमका सदस्य सचिव रामेश्वर थापा, मुकुन्द कार्की लगायतका केन्द्रीय तथा जिल्ला नेताहरूले स्वागत गरेका थिए ।
भक्तपुर दरबार क्षेत्रस्थित खौमा गेटमा पूर्व राजा ज्ञानेन्द्रको स्वागत गरिएको थियो । त्यहाँबाट पैदल हिँडेर उनी भक्तपुर तलेजु पुगेका थिए भने त्यहाँ दर्शनपछि फेरि पैदल नै हिँडेर टौमढीस्थित भैरवनाथ मन्दिर पुग्ने पूजा एवं दर्शन गरेका थिए ।
तलेजु भवानी र भैरवानाथको दर्शनपछि पूर्वराजा ज्ञानेन्द्रले सल्लाघारीस्थित होटल ग्रिनल्यान्डमा जनतासँग भेट गरेका छन् । त्यस क्रममा पत्रकारसँग उनले भक्तपुरको जनताको अपार माया पाएको प्रतिक्रिया दिँदै जनतासँग भेट्न पाउँदा खुशी लागेको बताए ।
उनले जनताको माया लागेको बताउँदै आफूप्रतिको विश्वास देखेर खुशी लागेको बताए ।
