काठमाडौं । नेकपा एमालेका अध्यक्ष केपी शर्मा ओलीले देशका विभिन्न समुदायले मनाउने चाडपर्वमार्फत सामाजिक सद्भाव फैलाउन आग्रह गरेका छन् ।
एमाले सम्पर्क समन्वय कमिटीले आज शनिबार दशैंतिहार नेपाल संवत, छठपर्वको अवसरमा आज शनिबार आयोजना गरेको शुभकामना आदानप्रदान कार्यक्रममा उनले भने, ‘हाम्रो मुलुक भौगोलिक विविधिता भएकाले चाडपर्वमार्फत सामाजिक सद्भाव फैलाउनुपर्छ ।’
अध्यक्ष ओलीले आफ्नो विचार अरुले अनुशरण गरेर लाभ लिन सकून् भनेर सामाजिक सञ्जालमा केही लेख्नुपर्ने पर्ने बताए । ‘फेसबूकमा स्टाटस लेख्छौं भने अर्थपूर्ण लेख्नुपर्यो,’ उनले भने, ‘स्टाटस लेख्दा गलत कुराको खण्डन र सही कुराको समर्थन र पक्षपोषण हुनुपर्दछ ।’
सामाजिक सञ्जालमा समाजलाई हानी पुर्याउने अश्लील, उत्ताउलो खालका कुरा नलेख्न अध्यक्ष ओलीले आग्रह गरे । सबैको भलाइको निम्ति सचेतना फैलाउने तरिकाले सामाजिक सञ्जालमा लेख्नुपर्नेमा जोड दिँदै उनले समाजलाई ठीक ठाउँमा लैजानका लागि राजनीतिक आवश्यक रहेको बताए ।
अध्यक्ष ओलीले हाम्रा चाडपर्व सामाजिक मूल्य–मान्यतासँग जोडिएको भन्दै चाडअनुसार मानिसको परिस्थिति पनि मिल्ने बताए । उनले अहिले नयाँ लुगा फेर्न र मिठो खानका लागि दशैं पर्खिने अवस्था कम मानिसमा रहेको बताए ।
‘पहिले मिठो खान र लगाउन दशैं पर्खनुपर्दथ्यो । त्यस्तो अवस्थामा थियो हाम्रो देश । आज त्यस्तो अवस्था छैन,’ उनले भने, ‘अझै पनि केही मानिसलाई मिठो खाना र नयाँ लुगा लगाउनका लागि दशैं पर्खनुपर्ने अवस्था रहेको छ । त्यो चिन्ताको विषय हो ।’
अध्यक्ष ओलीले ऋण बोकेर चाड नमाउन आग्रह गरे पनि अझै पनि केही मानिसलाई ऋण बोकेर दशैं मनाउने गरेको बताए । उनले दशैंलाई सत्यको दियो जगाउने चेतनाको प्रकाश पुर्याउने चाडपर्वका रूपमा मनाउन आग्रह गरे ।