तनहुँ । जिल्लामा दैनिक डेंगु संक्रमितको संख्या बढ्ने क्रम जारी छ ।
करीब २ महिनाअघिदेखि फैलिएको डेंगु दैनिक फैलिँदै जाँदा अझै नियन्त्रणमा आउन सकेको छैन ।
मंगलबार मात्रै १८२ जना नयाँ डेंगु संक्रमित थपिएको स्वास्थ्य कार्यालय तनहुँले जनाएको छ ।
जिल्लामा सोमबारसम्म ६ हजार ४८४ जना डेंगु संक्रमित रहेकोमा वृद्धि भई ६ हजार ६६६ जना पुगेका स्वास्थ्य कार्यालय तनहुँका प्रमुख शंकरबाबु अधिकारीले जानकारी दिए ।
व्यास नगरपालिकामा ६० जना नयाँ संक्रमित थपिएका छन् । यसअघि ५ हजार ४१५ संक्रमित रहेको पालिकामा थपिएर ५ हजार ४७५ जना पुगेको छ । डेंगु संक्रमितका कारण निजी क्लिनिक र अस्पतालमा दैनिक भीडभाड हुने गरेको छ भने कतिपय पोखरा र चितवनसम्म धाउन थालेका छन् ।
जिल्लाको अन्य पालिकामा शुक्लागण्डकी नगरपालिकामा ४९६, ऋषिङ गाउँपालिकामा १९४, भिमाद नगरपालिकामा १८४, म्याग्दे गाउँपालिकामा ११०, भानु नगरपालिकामा ८४, बन्दीपुर गाउँपालिकामा ४७, आँबुखैरेनी गाउँपालिकामा ३९, देवघाट गाउँपालिकामा २२ र घिरिङ गाउँपालिकामा ९ जना संक्रमित भएका छन् ।
डेंगुबाट बच्न बयस्क एडिज जातको लामखुट्टेको टोकाइबाट बच्नु नै उत्तम उपाय भएको घर वरिपरि पानी जम्न नदिने, सुत्दा झुलको प्रयोग गर्ने, पूरा बाउला भएका कपडा लगाउने लगायतमा सतर्कता अपनाउनुपर्ने दमौली अस्पतालका प्रमुख डा. परिवर्तन बरालले बताए ।
डेंगु संक्रमित भइसकेको अवस्थामा चिकित्सकको परामर्श अनुरूप औषधि सेवन गर्ने, झोलिलो खानेकुरा प्रशस्त पिउने, फलफूल खाना र आराम गर्न उनले सुझाव दिए ।
