मोरङ । नेपाली कांग्रेसका महामन्त्री विश्वप्रकाश शर्माले नेपाली कांग्रेसबाट विजयी स्थानीय तहका जनप्रतिनिधिले जनतासँगको सम्बन्धलाई बलियो बनाउनुपर्ने बताएका छन् ।
नेपाल डेमोक्रेटिक लयर्स एसोसियशन मोरङद्वारा आज शुक्रबार आयोजित प्रदेशस्तरीय स्थानीय तहमा कानूनी तथा वित्तीय सुशासन सम्बन्धी अन्तर्क्रिया कार्यक्रमको उद्घाटन गर्दै उनले स्थानीय निकायका कांग्रेसका ३३२ प्रमुखले संगठित रूपमा जनताको कार्य गरी पार्टीलाई बलियो बनाउनुपर्नेमा जोड दिए ।
महामन्त्री शर्माले लोकतान्त्रिक प्रणालीप्रतिको जनताको विश्वासलाई घनीभूत बनाउन जनप्रतिनिधिहरूको ठूलो भूमिका रहेको चर्चा गरे । उनले स्थानीय निकायले प्राप्त अधिकारलाई सतर्कताका साथ नागरिकको हितका लागि प्रयोग गर्न आग्रह गरे ।
महामन्त्री शर्माले लोकतान्त्रिक शासन व्यवस्थामा सडकमा प्रदर्शन गर्न पाउनु नै सबैभन्दा सुन्दर पक्ष भएको चर्चा गरे । उनले अहिले सबैको ध्यान मुख्य रूपमा भूकम्पबाट पीडितका लागि अस्थायी टहरा निर्माण एवं न्यानो कपडा व्यवस्थाका लागि केन्द्रित हुनुपर्ने बताए ।
पार्टीका केन्द्रीय सदस्यत्रय डा. डिला संग्रौला, सरिता प्रसाइ र भीम पराजुलीले लोकतन्त्रको जग स्थानीय तह भएकोले जनप्रतिनिधिलाई कानूनी अड्चनका विषयमा जानकारी दिनुपर्ने सुझाव दिए ।
कोशी प्रदेशसभा सदस्य हिमाल कार्की, कांग्रेसका मोरङ उपसभापति भक्ति माझी, गुरु घिमिरे, वरिष्ठ अधिवक्ता भरतबहादुर थापा, समूहका मोरङ अध्यक्ष डिल्लीप्रसाद दाहाल, कर्णाली प्रदेशका अध्यक्ष पदमबहादुर शाही, केन्द्रीय उपाध्यक्ष कविता बस्नेतले स्थानीय तहको कानुन समस्या समाधान गर्न कार्यक्रमको आयोजना गरिएको जानकारी दिए ।
अन्तर्क्रियामा प्रदेशका स्थानीय तहमा कांग्रेसबाट विजयी प्रमुख, उपप्रमुखको सहभागिता रहेको छ ।
