महोत्तरी । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टीका कार्यकर्ताको रूपान्तरणको सवाल मुलुकसँग गाँसिएको बताएका छन् ।
महोत्तरीको गौशालामा मंगलबार आयोजित पार्टीको ३ महिने रूपान्तरण अभियानको मधेश प्रदेशस्तरीय समीक्षा बैठक र प्रशिक्षण कार्यक्रममा प्रधानमन्त्री प्रचण्डले पार्टीका नेता कार्यकर्ता रूपान्तरित भए मात्र संघीय लोकतान्त्रिक गणतन्त्र सबल हुने बताए ।
‘मुलुकमा संघीय लोकतान्त्रिक गणतन्त्रको बिगुल नेकपा माओवादीले फुकेको हो,’ प्रधानमन्त्री प्रचण्डले नेता तथा कार्यकर्तालाई प्रेरित गर्दै भने, ‘यसको स्थायित्व र सवलीकरणको नेतृत्व पनि हामीले नै गर्नुपर्छ ।’ स्वार्थभन्दा माथि उठेर काम गर्न उनले निर्देशन दिए ।
‘हामीमाथि मुलुकको बृहत् कार्यभार छ, हामीले आफ्नो चरित्र बिगार्नु हुँदैन, गलत बाटोमा लागेको भए तत्काल सच्चिनुपर्छ,’ प्रधानमन्त्री प्रचण्डले भने, ‘त्यही सच्चिन, रूपान्तरित हुनु अभियानको अभिष्ट हो ।’ अभियानका क्रममा जनसरोकारका मुद्दा पार्टीका नेता कार्यकर्ताले उठाउन र उजागर गर्न उनको अपिल छ ।
अभियानमा जोडिएका सबै नेता–कार्यकर्ताको मूल्यांकन पार्टी नेतृत्वले गरिरहेको उनले बताए ।
मधेश प्रदेश प्रमुख लिलामणि पोखरेलको अध्यक्षतामा सम्पन्न कार्यक्रममा मधेश प्रदेशका सबै केन्द्रीय सदस्य, प्रदेश समितिका पदाधिकारी तथा सदस्य, रूपान्तरण अभियानका जिल्ला संयोजक र सम्बद्ध सदस्य लगायत सहभागी थिए ।
-1732180435.webp)
