रुकुम पश्चिम । जाजरकोट भूकम्पबाट प्रभावित रुकुम पश्चिमको आठबीसकोट नगरपालिकामा अस्थायी आवास निर्माणका लागि करीब १० हजार लाभग्राही पहिचान गरिएको छ ।
भूकम्प गएको १ महिनापछि सार्वजनिक विवरणअनुसार नगरपालिकाका १४ वटै वडामा ९ हजार ९६२ घरपरिवार पहिचान भएको नगरपालिकाका निमित्त प्रमुख प्रशासकीय अधिकृत मणिराज शाहले जानकारी दिए ।
शाहका अनुसार अब सोही आधारमा भूकम्प प्रभावितले अस्थायी आवास निर्माणका लागि रकम प्राप्त गर्नेछन् । यसअघि नगरपालिकाका भूकम्प प्रभावित ४ हजार ५०० परिवारले अस्थायी आवास निर्माणका लागि २५ हजारका दरले ११ करोड २५ लाख रुपैयाँ प्राप्त गरिसकेका थिए । शाहका अनुसार अब बाँकी ५ हजार ४६२ जनाले पहिलो किस्ता बापतको रकम प्राप्त गर्नेछन् ।
नगरपालिकामा हालसम्म निर्माण भएका अस्थायी आवासको तथ्यांक संकलन भइनसकेको उनले बताए । ‘विभिन्न राजनीतिक दलले स्वयंसेवाका रूपमा अस्थायी आवास निर्माण गरिरहनुभएको छ । केही निर्माण सम्पन्न भएर पनि अस्थायी आवासमा बसिसक्नुभएको छ । यसको यकिन वितरण नगरपालिकामा आएको छैन । विवरण संकलन गरेर १–२ दिनभित्र सबै वडा कार्यालयलाई पठाउन भनेका छौं,’ उनले भने ।
केही भूकम्पपीडित अस्थायी आवासमा बसे पनि अधिकांश अझै पनि त्रिपालकै भरमा बस्न बाध्य छन् । नगर प्रमुख रवि केसीले मंसिरभित्र भूकम्प प्रभावित सबैलाई अस्थायी छानामुनि ल्याउने गरी काम भइरहेको बताए ।
जिल्लाका ६ वटै पालिकामा आठबीसकोट, चौरजहारी र मुसीकोट नगरपालिका तथा त्रिवेणी, बाँफीकोट र सानीभेरी गाउँपालिकाका भूकम्प प्रभावित १५ हजार ६८९ का लागि पहिलो किस्ताबापत ३९ करोड २२ लाख २५ हजार सम्बन्धित स्थानीय तह विपद् व्यवस्थापन समितिको खातामा पठाइएको जिल्ला विपद् व्यवस्थापन समितिका संयोजक तथा प्रमुख जिल्ला अधिकारी हरिप्रसाद पन्तले जानकारी दिए ।
