उदयपुर । नेपाली कांग्रेसका महामन्त्री गगनकुमार थापाले प्रधानमन्त्री पुष्पकमल दाहाल ‘प्रचण्ड’लाई प्रश्न सोध्ने बेला भएको बताएका छन् ।
नेपाली कांग्रेस उदयपुरको प्रथम जिल्ला सम्मेलनलाई आज कटारीमा सम्बोधन गर्दै उनले १ वर्षभित्रमा प्रधानमन्त्रीले भनेको जस्तो काम किन गर्न सकिएन भनेर सोध्ने बेला आएको बताए ।
पुस १० गते प्रधानमन्त्री प्रचण्डले सम्बोधन गर्ने बताएको भन्दै कांग्रेस नेता थापाले आगामी माघ १० गतेसम्म एकपटक पनि कतै केही नबोली काम गर्ने प्रतिबद्धता जनाउन आग्रह गरे । ‘माघ १० गतेसम्म केही उद्घाटन गर्दिनँ, शिलान्यास गर्दिनँ, केही बोल्दिनँ, बिहानदेखि बेलुकासम्म काम गर्छु भन्नुभएको छ,’ महामन्त्री थापाले भने, ‘हामीलाई बोल्ने मात्रै मान्छे होइन काम गर्ने मान्छे चाहिएको छ ।’
संविधान बन्दा देशमा केही होला भनेर पर्खिएका जनता अहिलेसम्म निराश रहेको नेता थापाको भनाइ थियो । ‘त्यसैले हामीले अब कामको परिणाम देखाउनुपर्छ,’ थापाले भने, ‘२०८४ सालको चुनाव हारिएला भन्ने होइन, चुनाव हारे पनि केही हुन्न तर जनतालाई कामको परिणाम देखाउन कांग्रेसले केही गर्नुपर्छ ।’
भ्रष्टाचारको अन्त्य र सुशासन कायम गर्ने कांग्रेसको दायित्व रहेको उनले बताए ।
कांग्रेसका सहमहामन्त्री भीष्मराज आङ्गदेम्बेले कांग्रेसले देशलाई अप्ठ्यारो पर्दा भरोसा दिनुपर्ने बताए । गणतन्त्र, संघीयता, समावेशिता, लोकतन्त्रमाथि कुदृष्टि राख्नेप्रति सचेत हुनुपर्ने उनले बताए ।
नेत्री डिला संग्रौलाले ३ तहमा कांग्रेस सरकारमा रहेकाले कांग्रेसले जनताको अधिकार दिन सक्यो कि सकेन भन्ने विषयमा छलफल गर्नुपर्ने बताइन् । जिल्ला सभापति हिमाल कार्कीको सभापतित्वमा सम्पन्न कार्यक्रम पश्चात बन्दसत्रमा संगठनका बारेमा थप छलफल गरिने सम्मेलन आयोजक समितिका संयोजक राजेशचन्द्र श्रेष्ठले बताए ।
-1732613116.jpeg)
