बैतडी । प्रधानमन्त्री कप पुरूष एकदिवसीय राष्ट्रिय क्रिकेट प्रतियोगिताको सुदूरपश्चिम प्रदेशस्तरीय छनौटमा बैतडीले अछामलाई पराजित गरेको छ ।
बैतडीले आज मंगलबार भएको खेलमा अछामलाई ९८ रनले हराएको हो ।
बैतडीको लगातार यो दोस्रो जीत हो । उसले यसअघि पहिलो खेलमा बझाङलाई १८१ रनले पराजित गरेको थियो ।
निर्धारित ५० ओभरको खेल हुस्सुका कारण ४० ओभरमा झारिएको थियो । फाप्ला क्रिकेट मैदानमा टस जितेर पहिला ब्याटिङ गरेको बैतडीले ३८ दशमलव ५ ओभरमा सवै विकेट गुमाएर २१३ रन बनायो । जीतका लागि पाएको २१४ रनको लक्ष्य पछ्याउने क्रममा अछामको पारी २८ दशमलव ५ ओभरमा ११५ रनमै समटियो ।
बैतडीका लागि नरेन भट्टले अर्धशतकीय पारी खेले । उनले ५२ रनको योगदान दिए । भट्ट खेलको ‘म्यान अफ दी म्याच’ चुनिएको स्कोरर नरेन्द्रराज भट्टले बताए ।
खडक बोहराले ३४, वसन्त खत्रीले २७, नरेश चन्दले २२, सुदीप टमाटाले २२ तथा रिसिकेश बोहराले १६ रन बनाए । बलिङतर्फ अछामका रोहित खड्का र अभिषेक चौधरीले ३/३ विकेट लिए ।
अछामका लागि ब्याटिङ गर्ने क्रममा महाजन कुँवरले सर्वाधिक २४ रन बनाए । बलिङतर्फ बैतडीका लागि गजेन्द्र बोहराले ३ तथा भूपेन्द्र चन्द, रिसिकेश बोहरा र वसन्त खत्रीले २/२ विकेट लिए । बुधबार कञ्चनपुर र अछामबीच खेल हुनेछ ।
सुदूरपश्चिम प्रादेशिक क्रिकेट संघको आयोजनामा पुस १४ गतेदेखि सुरू भएको प्रतियोगिता पुस २४ गते सम्पन्न हुनेछ ।
