काठमाडौं । युरोपियन च्याम्पियन्स लिगअन्तर्गत क्वाटरफाइनल चरणका खेलहरू सम्पन्न भएसँगै एट्लेटिको म्याड्रिड र पेरिस सेन्ट जर्मेन (पिएसजी) सेमिफाइनलमा प्रवेश गरेका छन् भने बार्सिलोना र लिभरपुल प्रतियोगिताबाट बाहिरिएका छन् ।
स्पेनिस क्लबहरूबीचको प्रतिस्पर्धामा एट्लेटिको म्याड्रिडले बार्सिलोनालाई समग्रमा ३–२ ले पराजित गर्दै अन्तिम चारमा स्थान सुरक्षित गर्यो । दोस्रो लेगमा बार्सिलोनाले २–१ को जित निकाले पनि पहिलो लेगमा २–० को अग्रता बनाएको एट्लेटिकोका लागि समग्र नतिजा पर्याप्त बन्यो ।
दोस्रो लेगमा बार्सिलोनाले उत्कृष्ट सुरुवात गरेको थियो । लामिन यामालले सुरुवाती गोल गर्दै टोलीलाई खेलमा फर्काएका थिए भने फेरान टोरेसले अर्को गोल थप्दै समग्र स्कोर बराबरीमा ल्याएका थिए । तर एट्लेटिको म्याड्रिडका एडेमोला लुकम्यानले निर्णायक गोल गर्दै टोलीको अग्रता पुनः स्थापित गरे ।
खेलको ७९औँ मिनेटमा बार्सिलोनाका डिफेन्डर एरिक गार्सियाले रातो कार्ड पाएपछि टोली १० खेलाडीमा सीमित भयो । त्यसपछि बार्सिलोनाले दबाब बनाए पनि थप गोल गर्न नसक्दा प्रतियोगिताबाट बाहिरिन बाध्य भयो ।
अर्को क्वाटरफाइनलमा पेरिस सेन्ट जर्मेनले इंग्लिस क्लब लिभरपुललाई समग्रमा ४–० ले हराउँदै प्रभावशाली रूपमा सेमिफाइनलमा स्थान बनायो । दोस्रो लेगमा २–० को जित निकाल्ने क्रममा उस्मान डेम्बेले नायक बने, उनले दुवै गोल गर्दै टोलीलाई सहज जित दिलाए ।
एनफिल्डमा भएको खेलमा लिभरपुलले केही अवसर सिर्जना गरे पनि गोल गर्न सकेन । मोहम्मद सलाहको पासमा मिलोस केरकेजले गरेको प्रहारलाई पिएसजीका गोलकिपर मात्भेई साफोनोभले उत्कृष्ट बचाउ गरेका थिए । खेलका क्रममा पाएको पेनाल्टी पनि भिएआरमार्फत उल्टिँदा लिभरपुल खेलमा फर्किन असफल रह्यो । अन्ततः पिएसजीले दुवै लेगमा उत्कृष्ट प्रदर्शन गर्दै समग्रमा स्पष्ट जित निकाल्दै अन्तिम चारमा स्थान सुरक्षित गर्यो ।
अब सेमिफाइनलमा एट्लेटिको म्याड्रिडले आर्सनल वा स्पोर्टिङ सिपीमध्ये एकसँग प्रतिस्पर्धा गर्नेछ भने पिएसजीले बायर्न म्युनिख वा रियल म्याड्रिडमध्ये एकसँग प्रतिस्पर्धा गर्नेछ । उपाधि होड झन् रोमाञ्चक बन्ने अपेक्षा गरिएको छ ।
प्रक्षेपण राष्ट्रिय दैनिकबाट साभार।
